Solid Leni Bicol naging people’s movement sa Luz-Vi-Minda
Nagpuon sa urulay-ulay kan nagkaperang personalidad sa Ciudad nin Naga asin Camarines Sur na mag-organisar an Bicol Solidarity for Leni alagad naghiwas an grupo sa rehiyon Bicol asin inaapod na Solid Leni Bicol (SLB) sagcod na namundag an pink movement puon sa Luzon, Visayas asin Mindanao.
An mga convenor group kinababalihan ninda dating Alcalde Abang Mabolo kan San Fernando, Camarines Sur asin Chief of Staff ni 3rd district Congressman Gabby Bordado, Consejal Miles Raquid-Arroyo kan Ciudad nin Naga, negosyanteng Abet Bercasio, human rights lawyer Ricky Tomotorgo, dating Legal Office kan Ciudad nin Naga, Atty. Angel Ojostro, Atty. Lelia Reyta Tondo, Ronald Rodriguez sagcod nabilog regionwide asin iba pang mga nagsusuporta.
An Bicol Solidarity for Leni an blog na pangaran, ginibong SLB alagad an Solidarity naging Solid palaban sa Solid North.
Sinabi ni Mabolo naheling an pagkasararo kan mga Bicolano kan pangenutan kan grupo an Zoom Bungkaras Activity kan Hulyo 11, 2021 na ginibo sa Jesse M. Robredo Museum na partisipado hale sa manlaen-laen na sektor sa Bicol asin iba pang Bicolanong organisasyon sa abroad.
Katuyohan kaini nganing itulod si Bise Presidente Leni Robredo na magdalagan sa cargong presidente sa maabot na presidential election sa Mayo 9, 2022 alagad kun maghuros sa cargong gobernador dagos an saindang krusada.
Kan magdesisyon si VP Robredo na magplantiar nin certifico de candidatura sa Comelec komo independienteng candidatong presidente kan Oktubre 7, 2021 gamit an color pink, luway-luway naghihiro an tawo sa paagi kan ‘‘people’s movement’’ sagcod na nagkaigwa nin ‘‘pink caravan’’ kaiba an grupo kan Solid Leni Bicol na ginibo kan Oktubre 16.
Sa paagi kan people’s movement sa Bicol nagdakula an pink caravan naging nationwide hale sa Luzon, Visayas asin Mindanao.
Nagpadagos man an pink caravan sa Camarines Sur sa paagi kan ibang estelo sa Rinconada district na sinabayan nin street dancing alagad si mga nagdadalan nagluwas sa tinampo nganing magsarabay.
Kan mag-atubang si VP Robredo sa press conference sa Ciudad nin Naga kan Oktubre 27 nagpasalamat siya sa mga organizers na dawa dai siya nag-aaram asin sadiring gastos padagos naghihiro para sa saiyang lutsada nasyonal.
Alagad mas lalong naogma siya nin huli ta saro nang people’s movement sa Luzon, Visayas asin Mindanao an pink caravan asin naglalaom siya na makakaantos ini sundo sa eleksyon. (Danny P. Aureus)