Soltero na nagsaksak sa Ina nagutom, nagpuli sa magurang

Matapos magdulag asin nagutom napiritan an sarong soltero na nagsaksak nin anum na beses sa saiyang Ina nganing magpuli sa residencia kan saiyang magurang, dagos nang inarestar kan mga miembros kan pulis kan Police Station 2 kan Naga City Police Station mga alas 2:00 nin maagahon kan Martes, Agosto 30.

An suspechado si Hegino Francisco, mantang nagpuling burat sa saindang residencia aga kan Agosto 29 sa Zone 3, barangay Concepcion Pequeña, Ciudad nin Naga inangutan kan saiyang ina na si Mrs Elizabeth Francisco, 67 anyos alagad envez na magdangog kan sermon nagkuang kotselyo na dagos nang sinaksak nin anom na beses an ina na tolos man dinalagan sa Bicol Medical Center kan saiyang mga aki nganing mabulong asin salbado na nakapuli na sa saindang residencia.


Sinabi kan biktima na saiyang inangutan an saiyang aki huli ta permi nalang burat pagminapuli sa sainda alagad nabigla siya kan saksakon nin nagkaperang beses.


An suspechadado tolos nagdulag nagparalakaw abot sa Milaor asin sa Pili, Camarines Sur sagcod na nakikihagad nin kakanon.

Hegino Francisco nagsaksak sa saiyang ina

yaon sa Naga City police station matapos

dakopon kan mga pulis. (NCPO)


Ini an saiyang osipon ki P/MSgt. Tobias Bongon kan NCPO na napiritan mag uli sa magurang huli kan tinitios na gutom naghagad giraray nin dispensa sa saiyang ina.


Inako sa opisyal kan NCPO na matapos saksakon an saiyang ina, nagsaksak man sa sadiri alagad dai pinatadum asin pinabulong man giraray kan saindang magurang sa hospital.


An suspechado naggagamit nin ilegal na droga na pigtutubodan saro sa dahilan nganing magtumang sa magurang.

Si Hegino 37 anyos sinangatan caso kan pulis alagad sinibog kan ina.