top of page

Soltero nagduduyan pigparabadil, gadan

Sarong 24 anyos na soltero haling Zambales nagpuli sa saindang familia nganing magbakasyon ngunian na Semana Santa alagad mientras na nagpapahingalo sa duyan sa saindang residencia pinagbabadil kan dai pa mabidbid na suspek na dai nahaloy binawian man sanang buhay an biktima.


Si P/Major Michael Bordado, jefe de pulisiya kan Pamplona, Camarines Sur nagpahayag an biktima pigmidbid na si Jeffrey Subastil residente kan Brgy. San Isidro, Pamplona, Camarines Sur mientras na nagpapahingalo sa duyan alas 12:00 nin udto kan Domingo, Marso 24, 2024 binadil nin duwang beces sa payo nin dai pa maaraman na kalibreng badil na tolos man binawian nin buhay.


Nagpapadagos na an imbestigasyon kan MPS alagad blangko pa huli ta sagcod sa ngunian dai maaraman an motivo kan krimen. Alagad naghahanap sinda sa ibang residencia na posibleng nakua sa CCTV camera.


An suspek na lunad sa motorsiklo nakasulot nin helmet tolos nagdulag matapos kan duwang paputok.


Hagad kan imbestigador kan PNP na magtestigos si nakaheling kan krimen huli ta nangyari alas 12:00 nin udto.


Si Punong Barangay Dennis Tarusanan kan Barangay San Isidro na nakadalagan sa lugar matapos kan kremin nagpahayag na bestado niya an biktima na maboot asin mayong record sa saindang barangay.

Comments


bottom of page