top of page

Soltero nang lupig sa 12-anyos na tugang arestado kan CIDG

Yaon na sa kamot kan mga awtoridad an sarong 19-anyos, soltero na inabuso nin duwang veces an saiyang tugang na dose anyos na daragita.


An suspechado nadakop kan Enero 3, 2023 pig-ngaranan kan CIDG Camarines Sur na si David Belale y Paloma, 19, asin residente kan Barangay Mayaopayawan, Milaor, CSur.


Binasahan kan mga awtoridad kan saindang bitbit na mandamiento de aresto ki Belale na pig-isyu kan Regional Trial Court sa Ciudad nin Naga asin pinaliwanag an saiyang deretso asin an casong pang-aabuso sa saiyang tugang na daragita.


Duwang casong pagbalga sa Acta Republica 8353 o panlulupig sa biktima asin mayong pigrekomendar na pyansa an jusgado.


Temporaryong detinido an acusado sa selda kan CIDG sa Ciudad nin Naga.


An acusado yaon sa listahan bilang ‘‘number 10 regional most wanted person’’ sa Bicol.


Sa lado kan suspechado saiyang pinahimotikan an caso huli ta ‘‘fabricated’’ an sinangat na asunto laban sa saiya kan dose anyos niyang tugang.

Comments


bottom of page