Solterong Burikaton

Tigsik ko an  madunong na mahabon

Kun nanok an turog mo, nakhuhukragong

Nakasanday sa agom, nagpapaimbong

Saka titirahon an saimong harong!

Tigsik ko an bagitong si Bossing

Naburat sa pugol na poder

Pagkaaga grabe an hangover

Nagpilingpiling, triple an paghiling!

Tigsik ko man an hading mortogo

Dakol an taram, kulang sa gibo

An reyna kuminawat nin kalayo

Turog sa abo, nasulo an Palasyo!

Tigsik ko an tawong masupgon

Sige sana an pahuyomhuyom

Piggagaranot na palan sa gutom

Aw, napasma, nagparaagul-ol!

Tigsik ko an solterong tapayason

Garong nang baoo an hirohiroon

Matuga na lamang an Bulkan Mayon

Dae pa nakakahadok sa kailusyon!

Tigsik ko pa an solterong burikaton

Nag-abot na lamang an Bagong Taon

Madali na pati an aldaw kan Paghukom

Sigeng hilumlom, dae nakakaagom!