Sombong sa nawawarang mga daragita, ‘‘false alarm’’, sabi

Iginilid kan Bicol PNP an sunod-sunod na mga nagluluwas sa social media na mga nawawarang kababaehan sa Camarines Sur maging sa Albay huli ta katapos-taposi ‘‘false alarm’’.

Ini an pigsabi ni Brig. General Rudolph Dimas, regional director kan Bicol PNP bilang kasimbagan sa kahaditan kan mga magurang sa nangyayaring sombong na ‘‘missing person’’.

An mga pahayag na ini ni Dimas kasunod kan mga kahapotan kan media sa Ciudad nin Naga kan maging bisita kan Naga City Police Office sa ginibong piglansar na ‘‘Road to K Kasimbayanan’’ sa Plaza Quezon kan Naga.

Sa report sa saiya kan Camarines Sur PNP Provincial Office an mga ‘‘reported missing’’ hali sa social media bako sa pulis. Naghadit an publico kan mawara nin tolong aldaw si Irish Mae Payonga kan Brgy. Marupit, Camaligan, Camarines Sur alagad nakua nang bangkay sa Cadlan, Pili, CamSur.

Pinaliwanag pa kan opisyal kan Bicol PNP an pigsasabing mga ‘‘missing person sa social media’’ igwang dai napuli nin perang aldaw sa saindang magurang huli ta nag-iba sa saiyang kailusyon, may problema sa laog kan saindang familia asin nagpalihis sana nin perang aldaw sa saindang barkada.

An suspek sa panggagadan ki Payonga nadakop na kan PNP na si Reymark Belleza, 18, parapadyak.

Ini nangyari sa Nabua, Goa, Siruma maging sa iba pang lugar mala ngani igwa pang estudiante alagad sa imbestigasyon kan PNP yaon sa ibang provincia huli sa problema sa saindang familia.

Enot nang nagpatanid si Provincial Director Col. Julius Cesar Domingo kan PNP sa Camarines Sur na kun igwang mga kaparejong sombong dapat ipaabot sa mga pulis station o Municipal Police Station.

Nakakasibot an PNP matapos magluwas an sinambit na mga insidente sa nagkaperang estasyon nin radyo asin television.