SP baranga sa isyu pagputol puon kahoy sa national road

Baranga pa an Sangguniang Panlungsod kan Ciudad nin Naga sa propuestong resolusyon na putolon na an 71 mga puon nin kahoy sa kalabaan kan Maharlika Highway sa Barangay Del Rosario sundo sa linderos kan Pili, Camarines Sur alagad mayoria sa miembros pabor na i-forward muna an isyu sa Department of Public Works and Highways (DPWH).


Si Consejal Joselito Del Rosario sa paagi kan saiyang privilege speech sa sesyon regular kan SP kan Martes, Oktubre 5 nanindogan na dapat putolon na an mga kahoy na ulang sa road right of way sa iimplementar na road widening project kan DPWH.


Sinabi pa kan consejal grabe an dakulang disbentaje an mga ulang na kahoy orog na kun nagkakaigwa nin bagyo nakaka-abala sa pagbalik kan suplay nin kuryente asin delicado pa sa mga aksidente sa vehiculo asin dapat tawan nin proteksyon an publico laban sa ano man na posibleng aksidente.


An propuestong resolusyon sa pagcontra pagputol kahoy pigtutulod ni Consejal Ghiel Rosales alagad sa ginibong division of the house apat an nagpabor na purotolon an mga kahoy na kinababalehan ninda consejales, Lito Del Rosario Dodith Beltran, Sonny Rañola asin Salvador del Castillo.


Pabor na i-forward muna sa DPWH iyo sinda Rosales, Mila Raquid Arroyo, Greg Abonal, Elmer Baldemoro, Vidal Castillo, Jose Perez, Jess Albeus asin Kyle Tripula.


Sinabi man ni Consejal Beltran na pabor siya na putolon na an mga kahoy nganing tawan buelo an expansion kan national road sa ciudad asin mayormente delicado sa aksidente an mga puon nin kahoy sa gilid kan tinampo. ‘‘An kahoy dapat sa bukid bako sa tinampo’’


An isyu kapalibotan iyo an mayor na dahilan kan proponente na ulangon an planong pagputol sa mga puon nin kahoy kan DPWH.


Sinabi pa ni Del Castillo na saro sa nagcontra sa resolusyon sa dahilan nganing ma-implementar na kan obras publica an pagpahiwas kan tinampo, igwa nang enot na resolusyon an SP kan 2018 na dai na sinda nagcocontra sa pagputol kan puon nin kahoy.


Kabale sa resolusyon na inaprubaran kan 2018 para sa pagputol kan mga kahoy sa mga minasunod na lugar kan M.T. Villanueva Ave., Magsaysay Ave., barangay San Felipe, Pacol sundo sa Carolina.


An sinambit na resolusyon bako lang saindang desisyon envez sa rekomendasyon pa kan City Development Council.


Pinahayag pa ninda Beltran asin Del Castillo dapat madagos na an pagputol kan mga kahoy nganing dai masayang an fondo asin an kahoy dapat ibugtak ta tamang lugar na dai makakaulang sa road right of way kan gobierno.


Nanghinayang an mga consejales kan mga nakaaging taon igwa nang P100 milyon an DPWH para sa road widening project sa Del Rosario-Concepcion Pequena hasta sa Diversion road alagad ibinalik sa national treasury.


Saro sa dakulang dahilan ‘‘mas mahalaga an buhay kan tawo kay sa buhay kan kahoy ta dawa saen puedeng magtanom dawa pera asin sa tamang lugar’’, sabi pa ni Del Castillo.


An DPWH nagpa-aram na sa City Hall sa road widening project asin may puputolon na mga kahoy na aagihan kan proyekto.


An Ciudad nin Naga na sana an nahuhuri mantang sa ibang mga provincia mayong mga nagcontra sa ulang na mga estractura asin puon nin mga kahoy nganing tawan nin buelo an pig-iimplementar na mga road right of way. (dpa)