top of page

SP dai na kaipuhan magpasar resolusyon sa gun ban-NCPO

Kun an Naga City Police Office (NCPO) an hahapoton dai na kaipuhan magpasar nin resolusyon an Sangguniang Panlungsod kan Ciudad nin Naga nganing hagadon sa higher command kan Philippine National Police na ipasa-irarum sa gun ban an Ciudad nin Naga sa panahon kan Peñafrancia fiesta ngunian na Septiembre.


Ini an mga pahayag ni PSMS Tobias Bongon, opisyal na parataram kan NCPO sa plano kan City Hall na hagadon sa PNP na dapat ipasunod sa ciudad an gun ban sa maabot na Festividad ni Ina.


An ponto kan NCPO na mas magabat an Comelec resolution sa gun ban na epektivo na kan Agosto 28 hasta Noviembre 29, 2023 huli kan nakatalaan na Barangay asin Sangguniang Kabataan election sa Oktubre 30, 2023.


Nagpoon na an election period mala ngani an NCPO igwa nang mga pig-andam na Comelec-PNP check point sa mga estratihikong lugar nganing maseguro an paz y orden.


Magigirumduman kan panahon pa ni dating Alcalde John Bongat cada maabot an Peñafrancia fiesta an Sangguniang Panlungsod napasar nin resolusyon tanganing hagadon sa PNP na ipasa-irarum an ciudad sa gun ban.


Alagad sa ngunian bako lang sa Ciudad nin Naga an Comelec gun ban envez sa enterong nasyon para sa maabot na pirilian sa Oktubre 30 na mas halawig pa hasta sa Noviembre 29, sabi pa kan NCPO.


Sa panahon kan kapiestahan ni Ina an NCPO igwang augmentation force hali sa Camp Semion Ola asin Philippine Army hali sa 9th Infantry Division na katuwang kan ciudad na maseguro an paz y orden orog na sa actividad kan Traslacion asin Fluvial procession.


Kadakul na mga actividades an simbahan asin an City Hall na kaipuhan maseguro kan NCPO an paz y orden mantang ribo-ribong mga devotos ni Ina an nakatalaan magsungo sa kapiestahan ngunian na bulan nin Septiembre.


An NCPO nawarak nin kapupulisan sa mga simbahan, mercado publico, establisimiento de negosyo asin katuwang pa sa pagmantenir kan trafico.

Comentários


bottom of page