SP nagtagama nin P10-Msa Covid-19 sa 2021 budget

Nagtagama na nin suhay na budget an lokal na gobierno kan Ciudad nin Naga sa coronavirus disease (Covid-19) na premirong ginibo ini kan Sangguniang Panlungsod sa pamamayo ni Bise Alcale Cecilia ‘‘Nene’’ De Asis nin huli kan pandemya sa inaprubaran na P1.4 bilyon na 2021 annual budget.

Si Consejal Salvador del Castillo, Vice Chairman kan Finance and Appropriation Committee kan SP nagpahayag sa Bicol Mail na saindang pinagkasurondoan na kaipuhan magkaigwa na nin suhay na alokasyon na cantidad P10 milyon para sa Covid-19 sa inaprubaran na 2021 annual budget sa sesyon espesyal kan Deciembre 29, 2020.

Alagad huli ta dikit sana an sinambit na prosupuesto kun kinakaipuhan puedeng hugotan nin fondo an Naga City Hospital, Infirmary Hospital asin City Health Office na gagamiton an fondo na may relasyon sa Covid-19.

Afuera pa kaiyan, puedeng hugotan pa nin fondo an calamity fund asin 20% Economic Development Fund na tinutugot base sa regulasyon na pinaluwas kan gobierno nasyonal, sabi pa ni del Castillo.

Saiya pang piglinaw na kun nakaayon an calamity fund tinutugot ini mantang sagcod pa sa Septiembre 21, 2021 huli kan pandemya sa pigdeclarang state of health calamity ni Presidente Rodrigo Duterte.

Si Consejal Sonny Rañola, Chairman kan Committee on Health nagsabi na dakulang bagay na igwang sadiring fondo para sa Covid-19 nganing perming preparado an City Hall mantang sagcod sa ngunian mayo pang asegurasyon na matatapos na an problema sa virus dawa na ngani igwa nang na-imbentong bakuna laban sa virus.

Sa isyu na haros dikit lang si deferensya kan P1.4 bilyon 2021 annual budget kumpara kan nagtalikod na taon 2020, sinabi pa kan vice chairman kan appropriation committee an magabat na dahilan iyo an pagbagsak kan saindang koleksyon sa buwis na apektado an mga negosyante epekto kan pandemya.

Nagpalyar an City Hall na makua an tax collection target na P1.4-B para sa 2020 na mayor na dahilan na apektado an economia huli kan pandemya.

Base sa datus kan City Treasurer’s Office, an total tax collections kan nagtalikod na taon nag-abot sana sa cantidad P1,225,835,209.65 na nagkulang nin maabot sa P200 milyon hale sa target revenues na P1.4-B.

Afuera pa kaini, an 2020 tax collection mas hababa nin P43-M hale sa 2019 total revenue collections na P1,268,928,371.35.

Maging man an Internal Revenue Allotment (IRA) ngunian na taon dikit sana si piglangkaw na nag-abot sana sa P700 milyon hale sa dating P634,121,420.00, sabi pa kan consejal. (DPAureus)