Special permit muna bago viaje - LTFRB

Tinutugotan na kan gobierno provincial kan Camarines Norte na buelta na an viaje hale sa saindang provincia asin Ciudad nin Naga puon Febrero 1, 2021 alagad dai maka-viaje an mga pampasajerong bus asin van mantang kaipuhan magkua muna sinda nin special permit sa Land Transportation and Franchising and Regulatory Board (LTFRB).


An special permit mandato kan Inter-Agency Task Force (IATF) base sa memorandum circular kan LTFRB na dai puedeng magbalik sa viaje an bus asin van sa saindang dating ruta sagcod na mayong special permit.


Ini an mga pahayag sa Bicol Mail ni Bicol Central Station (BCS) operation manager Nonoy Reforsado nin huli ta saro sa rekisitos maging paglaog sa bus terminal dapat kumpletong papeles an maviajeng bus.


Nagkapera nang bus operator an nasa proceso na sa saindang pag-apply sa LTFRB na inaabot nin sampolong bulan antes sinda tinugotan kan ahencia asin kan gobierno provincial kan Camarines Norte huli kan pandemya.


An aviso sa mga bus driver na kun magbuelta na kan saindang operasyon dapat magsunod sa gabos na health protocol asin 60 por ciento sana an pasajeros na tutugotan sa cada viaje.


An dai pagtugot kan LGU Camarines Norte iyo man an pigtutubodan nganing hababaon an caso sa coronavirus sa saindang provincia.


Sa lado kan City Hall, segun pa ki Reforsado haloy na sindang nagtaong rekomendasyon sa IATF nganing ipadagos an viaje sa Camarines Sur asin Camarines Norte alagad an naabala an permit hale sa opisina central kan LTFRB.


Sainda pang hinahalat an pagtugot kan inter-regional route kun nuarin ibubuelta an regular na viaje.


Apektado na an pagbuhay kan mga bus driver huli kan kawaran nin trabajo mantang an iba naglaog komo jeepney driver dawa na bakong regular ngani sanang mabuhay an saindang familia ngunian na panahon kan pandemya. (dpa)