Speed limit ordinance higot na iimplementar sa 2023

Nakatalaan nang estrictong iimplementar kan Public Safety Office an ‘‘Naga City Speed Limit Ordinance’’ nurong taon sa mga mayor na kalye kan ciudad, alagad malatag ngona nin mga pinatindog na billboard speed limits sa lugar na limitado sa 30kph.

Ini an pig-aandaman kan PSO sa pamamayo ni professor Renne Gumba na kaipuhan an fondo sa ipapatindog na mga billboard speed limit sa mayor na kalye asin centro de negosyo.

Sa pig-aandaman na annual budget kan City Hall mahagad sinda nin dugang na fondo para sa sinambit na katuyohan.

Saro sa katuyohan digdi nganing malikayan an naglalangkaw na caso nin mga aksidente sa trafico na kadakle an envuelto iyo an motorsiklo.

Afuera pa kaini, kukumpletohon na an mga traffic light nganing gabos operational na makakatabang sa pagmantenir sa bulos kan trafico.

An speed limit ordinance No. 2019-099 inaprubaran kan Sangguniang Panlungsod na padreno si Consejal Joselito del Rosario asin iimplementar sana sa haros gabos na kalye sa centro kan ciudad sa sunod na taon 2023.

Sa ordinance kan City Hall nagtalaan nin mga billboard speed limits sa mga tinampo na dapat 30kph sa gabos na klase nin vehiculos .

An mga mayor na tinampo na sakop kan ordinansa iyo city asin national road maging kan provincial road. An ‘‘crowded streets’’. An ordinansa kinababalihan kan heavy pedestrian traffic, gabos ba kalye sa laog kan ‘‘500 meters radius of the perimeter’’ kan escuelahan, mga pigtatrabajohan na lugar, recreational places, shopping malls, hotels, saka restaurant.

Alagad igwang exemption sa mga emerhencia arog kan doctor, health wokers na nagreresponde sa apod nin emerhencia. Mga tsuper na nagdadara nin pasyente pasiring sa hospital o sa clinic asin AFP na nag-aapreta sa saindang mga operasyon laban kriminalidad asin insurhencia asin kabale pa si mga barangay, PSO, asin traffic enforcers.

Sa mga magbabalga kakastigohon nin multa poon sa P3,000 hasta P5,000 asin impounding kan vehiculo asin pagkakapreso sa laog nin diez diyas depende sa diskresyon kan jusgado. (dpa)