SPMK @ 60 sa 2024
Kan Oktubre 10, 2023 sabay kan Loyalty Day kan UP Los Baήos bako lang sa mother chapter kan organisasyon kundi sa gabos na lugar sa kinaban na igwa ni miyembro an Sarong Bangui Organization International.
Sa kaparehong petsa norong taon senior na an SB ta 60 anyos na an edad kaini.
Namundag an socio-civic organization, bakong fraternity o sorority kan 10ng mga Bikolano na mga estudyanteng pungaw sa saindang mga magurang kan Oktubre 10, 1964 sa sarong sapa harani sa Baker’s Hall kan higanteng universidad.
Dating pig-aapod Bikol Varsitarians na compuesto nin mga Bikolanong estudyantes kan UP College of Agriculture asin UP College of Forestry. Piguibong sarong pusog na organisasyon tanganing magdanay, magka-igwang dayupot na iribanan an mga miyembros asin mapara an kalipungawan ta sinda nag-eereskwela asin nag-eerestar harayo sa Kabikolan.
An primerong president (founding president) iyo si Renato Cavita Villabroza na taga-Gainza asin Naga saka 9 pang iba na mga SB pioneers o chartered members harali sa manlaen-laen na provincias kan Bikol poon Sorsogon, Camarines Sur, Camarines Norte, Albay, Catanduanes asin Masbate.
An logo kan organisasyon poon paka-poon iyo an imahen kan bulkan Mayon sa tahaw na napapalibutan nin 6 na bituon na mina-representar kan 6 na provincias kan rehiyon.
An motto na saindang pigkukurahaw sagkod ngonyan batay sa saindang pagtubod iyo an “ Sa Pagkasararo may Kusog” o SPMK.
An katuyuhan kan mga founders asin enot na miyembros kan SB ipreservar o padanayon an estorya, kultura asin lenguaheng Bikolnon asin ibalangibog ini para sa masurunod na henerasyon bako lang sa Bikol, sa Pilipinas kundi sa bilog na kinaban.
Ipigrorokyaw ninda asin ipig-oorgolyo an pagka-Bikolano.
An enot na mga advisers iyo sinda depuntong Agriculture Secretary Salvador “Sonny” Escudero III asin Atty. Loida Nicolas Lewis, topnatcher University Councilor kaidto na naguin presidente kan Bicol National Association of America (BNAA).
Kan enot mayo nin hazing o kastigo asin gabos na Bikolano sa UPLB campus konsideradong miyembros alagad pakalihis 2ng taon apuera kaidtong dati nang mga miyembros, itong mga kabali sa greek-letter societies (e.g. Beta Sigma, Upsilon Sigma Phi, Alpha Phi Omega etcetera) dae na pig-ako tanganing maasegurar an lealtad kan mga miyembros sa organisasyon.
Igwa nang reporting asin pasakit sa mga aplikantes. An makulog kaidto ta maski an SB pusog, organisado asin compuesto nin mga detalentong miyembros pero dae pigreconocir kan administrasyon kan universidad ta an sarong Bangui ta konsideradong regional organization.
Maski nag-aayon sa mga aktibidades kan Loyalty Day halimbawa sa mga debate ( an team captain kan Sarong Bangui debating team iyo si Loreto Torps Cabaήes, na iyo na ngonyan an editor kan Manila Bulletin), rodeo asin sports events pero dae nasasambit an pangaran kan SB pig-aapod lang opisyalmenteng “Team B”.
Naguin president kan UPCA Student Government si Dario Sabularse kan Baao, Camarines Sur.
An editor-in-chief kaidto kan Aggie Green and Gold, an opisyal na publication kan UPCA. Sarong miyembro kan SB sa persona ni Engr. Pat Monte asin an managing editor si Elmer Abilay na naguin manager kan BISUDECO.
Nin huli ta naka-gradwar tulos sa kolehiyo si Villabroza asin naguin regional director kan Bureau of Agricultural Statistics, nagpadagos kan liderato kan SB sa Los Baήos kan 1966 asin iyo an lalong nagpa-pusog kan iribanan kan miyembros kaini sa laog kan UPLB campus, si Doming H. Discaya kan Casiguran,Sorsogon.
An headquarters yaon sa Catalan compound. Palibhasa purungaw sa hararayong pamilya kadaklan kan SB marhay mag-inom nin arak… kaya an sugot sainda “ sa Pagkasararo Buyong”. Iyan para sa mga lalake sa mga babae naman tutok lang sa pag-aradal kaya nagtarapos, may honor, an iba may masteral an iba may doctoral degrees pa.
Kan panahon na idto an mga juvenes na nangangapodan para sa nasyonalismo kontra kolonyalismo asin rehiyonalismo. Idto man an mga panahon kan mga grupong aktibista kaya dakul sainda an nag-apil sa mga aktibistang organisasyon arog kan Kabanataang makabayan, Khi-Rho Movement, Samahang Demokratikong Kabataan asin igwa ngani na nagsarakat sa bulod bilang pag-kontra sa gobyerno kaidto.
An iba nagpuruli sa saindang mga sadering banwaan lalo na kan mag-deklara nin martial law.
Kaya nagka-igwa nin sanga an SB sa mga provincia arog kan Naga, Pili, Legazpi City, Guinobatan, Tabaco, Kamaynilaan, Polangui, Biscast, Partido State University, Ragay, Daet, Labo, Tagkawayan, Quezon asin kadakul-dakol pang iba.
May mga miyembros na naguin politiko, journalists, announcers, bankero, parauma, sayantista, doctor sa medisina,igwa pa nin naguin opisyales kan militar asin kan pulisiya, professor, paratukdo, may mga nag-presidente nin eskwelahan, negosyente asin lideres nin komunidad, kapitan sa barangay. May mga naguin regional directors kan manlaen-laen na ahencias kan gobyerno.
Igwa man natawan onra kan UPLB dahil sa pagdupa kan kapakanan kan kapalibutan.
An mga nag-asenso sa pag-uma na nag-adal asin nagtapos nin agrikultura iyo sinda Simon Agor, Igmedio Aliήarte asin Mayor William Abilay, gabos kan Gainza, Camarines Sur. Idtong depuntong Simon Agor dae nungka nagtukal sa pag-uma, paghali sa Los Baήos sagkod siyang bawian nin buhay. Naguin konsehal asin bokal huli sa pag-uma.
Dae mababa sa 10mil na hermanos asin hermanas an miyembros sa palibot kan kinaban siyempre dae mahali an mga diresmentihan asin dae pagkaka-irintindihan poon kadto sagkod ngonyan.
Senior citizen na an organisasyon pero burugkos man guiraray sa ngaran kan Inang Kabikolan.
An hapot ngonyan saen an venue kan engrandeng ika-60ng anibersaryo kan sarong Bangui?
Kun ako an hahapoton dapat sa provincia nin Sorsogon, sa Sorsogon City, sa Irosin, Castilla o sa Casiguran.
Magherilingan kita!