SSS Service Office sa Partido may permanente nang locasyon
- Jul 27
- 2 min read
Ni Sonny Malate
SAN JOSE, CAMARINES SUR --- May permanente nang locasyon an Social Security System (SSS) San Jose Service Office. Ini namumugtak sa lumang edificio kan mercado publico sa barangay Boclod digdi.
Namumugtak sa likodan na parte kan service office an mga edificio para sa Rural Health Unit, Nephrozone, Municipal Police Station, Bureau of Fire Protection, asin National Bureau of Investigation Satellite Office. Sa sunod na mga bulan madadagdag man digdi an oficina kan MDRRMO.
An bagong locasyon nasa kalabaan kan national highway kaya madalion makua kan mga cliente gikan sa mainland kan Partido Area magin taga coastal na banwaan na Caramoan, Presentation asin Garchitorena
An SSS Service Office dating namumugtak sa sarong pribadong edificio na pigrerentahan sa may kalangkawan an presyo sa kataid na banwaan kan Goa. Ini pigbalyo sa San Jose kan Febrero 2025 sa lumang municipal building asin Pimentel Bldg. 1 na libre an renta.
Mismong si Alkalde Jerold B. Peña kan San Jose an nag-encaminar na magbalyo sa saiyang banwa an SSS mantang kabale sa mga advocia niya na maparani an servicio kan gobyerno sa saiyang banwa asin kataraid na localidad.
Sa pagmawot na mas magin madali, buwelo asin eficiente an servicio, napagkauroyon kan LGU San Jose asin SSS na magkaigwa nang permanenteng locasyon an service office. Kan nagtalikod na bulan ini oficial na pigbasbasan asin binukasan sa cliente sa bilog na distrito kan Partido.
An gastos sa ginibong repair, improvement asin pagpintura pig-asumer kan SSS. An servicio sa internet, kuryente asin tubig pigbabayadan pa kan ahencia. An pag-ocupar kan espasyo libre man giraray alagad pakalihis nin duwang taon an ahencia sisingilon na nin minimal na bulanan na rental fee.
Sa presente, an oficina iguang apat na personahes. Ini maasikaso kan verificasyon asin pagproceso kan mga beneficio. Apwera kaini, masimbag man dapit sa mga babayadan asin contribusyon.
Siring man, maasikaso dapit sa loan eligibility and application asin membership concerns asin iba pang mga transaction. Manonotaran na may mga transactiones na dae nasisimbagan sa level kan service office kaya ipinapasa ini sa mayor na oficina sa ciudad kan Naga.
Arog kan kadakol na ahenciang pampublico, computer-based asin on-line an transaction asin sistema sa service office. An mga senior citizen asin ibang cliente na dae gamay an bagong teknolohiya pig-aasistihan kan saindang personahes.
Mientrastanto, an Philippine Health Insurance Corporation (PhilHealth) asin Pag-IBIG Home Mutual Fund pirang taon nang iguang service office sa banwaan kan Goa na mayong rental fee na pigsisingil an local gobyerno sa edificiong pigdesignar sainda.
Sa pagkakaigua nin mga service office an mga ahencia kan gobyerno mismo sa laog kan iba-ibang distrito, nagigin harani, madali asin marikas an servicio kan gobyerno sa mga namamanwaan.
Comments