Starlight Aguador

Iyan an alias nin sarong tunay na tawo na taga Bicol River Area na iguang pambihirang klase nin hanapbuhay, ini an magsakdo nin inumon na tubig para sa residentes kan mga kostal na baryo sa Bicol River. Mayo pa sa pangitorogan kan mga pinoy an magka igua nin inaapod na “bottled water” o mineral water. Soltero pa sana si Starlight Aguador, itinukdo na kan saiyang mga magurang an sarong honesto asin malinig na trabaho, an mag sakod nin inumon na tubig hale sa irarom kan tulay kan Panganiban asin dadarahon sa mga harong duman sa Sua Camaligan, Sua Canaman, sagkod duman sa Fundado Canaman. Si Starlight Aguador, sarong maskulado asin mestisong lalaki na nagdakula sa riverside. An mga taga kostal mayong inumon na tubig kun kaya nag babakal sinda nin tubig sa mga parasakod na nag uusar nin baroto. An tubig ikinakaag sa plastic container asin ini igua nin kantidad asin pinag aaragawan kan mga taga kostal ta mas masiram an tubig sa Naga imbes kan tubig sa pasak na gripo ta an lugar dai man inaabot kan serbisyo kan Nawasa. Minsan sa interview sa radio station DWRN, sinabi ni Starlight Aguador na sindang mga taga kostal, nagkukua nin tubig sa gripo na yaon sa irarom kan Panganiban Bridge. Para ki Starlight Aguador, dai niya puedeng iribay an saiyang trabaho ta iyo idto an pinaka maogma asin may marhay na engresso tanganing mapa escuela niya an saiyang mga aki. Masulong pa sa bagas an tubig na saiyang pig tetienda sa kostal kaya garo siyang artista na pinag aabangan kan mga misis tanganing magbakal nin tubig. Sa pagka aga, namamakal siya nin balde nin pasayan asin kasag, sagkod talangkak ta ini saiyang pig dedeliber sa supermarket. Arog ni Ferdinand Magellan, si Starlight Aguador , iguang mga alalay na iyo an mga para sagwan kan baroto asin para alsa kan mga container nin tubig, sinda pig babayaran nin aldawan na sueldo. Sa aldao nin Domingo, si Starlight, iguang bitbit na trubenais na ta iyo an saiyang isinusulot tuyong siya minakanta sa “ Puede Pa Portion” sa DWRN. Kadakol nin nag aabang saiya sa radyo duman sa kostal kaya, sa saiyang pag puli, garo siyang Presidente na pig sasaludohan ta maogma kaidto an mga tawo na madangog sa radyo an saindang kababaryo. Si Starlight Aguador gikan sa lahi nin kastila, ta ini mestizo asin halangkaw asin maskulado arog man kan saiyang mga alalay anas maskulado ta esterado sa pagsagwan nin perang oras sagkod pag alsa nin tubig. Kay daa siya inapod na Starlight Aguador, ta an nag gigiya saiya sa pag sagwan pasiring sa river side iyo an Liwanag kan bitoon asin bulan. Ngonian na an mga lugar igua nin makukuanan nin masiram na tubig, asin igua na nin supply nin mineral water,dai na kaipuhan an arog ni Starlight. Iyo ini an sarong propesyon na naging popular sa river side kan idtong mga inot na dekada.