‘‘Stay Order’’ nagpabalik sa puesto ki Bongalonta, dai nakakalaog sa opisina

Pili, Camarines Sur --- Buelta sa puesto an sinuspending alcalde Tomas Bongalonta sa banwaan na ini matapos saiyang marecibe an ‘‘Stay Order’’ kan Lunes, Marso 8 hale sa Malacañang alagad pinaagi sa opisina rehiyonal kan Department of Interior and Local Government na pirmado ni director Anthony Nuyda.


Alagad sagcod sa sinusurat an baretang ini kasoodma dai siya nakakalaog sa Office of the Mayor mantang pinakandadohan kan nagtukaw na Acting Mayor Marivic Solano.


Pinadarahan na nin surat ni Bongalonta si Solano nganing i-turn over an liabe nganing makalaog sa tamang opisina kan jefe ejecutivo mantang sagcod kasoodma an saiyang temporaryong opisina sa Sports Complex kan saindang banwaan.


Kan magprobar na maglaog sa opisina an alcalde nagkaigwa nin tensyon huli kan mga kanya-kanyang suportadores kan acting mayor asin an nagbubueltang alcalde na pig-ulang nganing dai magpirit mag laog sa opisina.


Dai na nag-insister an alcalde na rangakahon an saiyang opisina envez nagpahunod nagbugtak nalang nin lamesa sa Sports Complex nganing gibohon niyang opisina.


Naging marikas an aksyon kan Malacañang mantang an duwang bulan na preventive suspension sa alcalde pig-implementar sana kan opisina ni Gobernador Migz Villafuerte kan Febrero 15.


Nagkaigwa nin programa sa Plaza kan pagbuelta sa puesto kan alcalde nganing ipaliwanag sa publiko an ‘‘Stay Order’’ kan Malacañang. Nagpaheling man nin suporta sa jefe ejecutivo iyo sinda Congressman Gabby Bordado kan tercer distrito kaibanan an saiyang Chief of Staff dating Alcalde Abang Mabulo, dating Congressman Rolando Andaya Jr., Alcalde Madel Alfelor kan Ciudad nin Iriga, mga miembros kan junta provincial kan oposisyon asin iba pang alcalde sa Camarines Sur.


Si Bongalonta, pigpasa-irarum sa duwang bulan na preventive suspension ni Gob. Villafuerte huli sa caso administrativo sa reclamo na pigpadagos niyang magpunksyonar sa puesto si Municipal Administrator Rex Resuena apesar na pigbasura kan Sangguniang Bayan an kumfirmasyon kan nombramiento maging kan Civil Service Commission. (dpa)