STL GINIBONG PRONTERA: Jueteng hagad kan PCSO ipapundo kan LGU, PNP

An sanga kan opisina provincial kan Philippine Charity Sweeptakes Office (PCSO) sa Camarines Sur nakatalaan hagadon an tabang kan lokal na gobierno kan Ciudad nin Naga asin sa Naga City Police Office (NCPO) na darakupon an mga kuryador sa ilegal na sugal na jueteng na ginagamit prontera an Small Town Lottery (STL).

Kun magdadanay an jueteng sa Ciudad nin Naga maging sa pagtaraid na banwaan posibleng dagos nang mabangkaruti an legal na operasyon kan STL.

Si Branch Manager Jobet Ramos kan PCSO Camarines Sur nagpahayag sa entrevista kan Bicol Mail sa paagi nin telepono na nangyari na an pagkalugi kan STL sa Albay huli ta dinaog kan operasyon kan ilegal na sugal na jueteng.

An STL milyones pesos an pigreremiso sa PCSO na ginagamit man na fondo sa mga charity program kan gobierno asin iba pang mga proyecto alagad an jueteng iba an nakikinabang envez mga opisiyal kan gobierno asin awtoridad.

Sinabi pa kan PCSO ma-duwang taon na an nakakagi an operator kan STL nagprubar na magkua nin mayor’s permit sa City Hall asin ibinasura sana alagad lakop an paglibot kan mga collector sa barangay maging sa opisina kan gobierno. Huli kaini, an operator nagbalyo sa Pili, Camarines Sur na tinawan business permit kan LGU.

An LGU, PNP asin iba pang ahencia kan gobierno igwang nakukuang kahirasan sa ganansa kan STL asin nagagamit pa sa mga charity project kan gobierno kabale na digdi an para sa hospital, maging mga pasyente na naghahagad nin asistencia finansyal alagad an jueteng mayong nakukua an gobierno.

Nin huli kaini, dapat mag-aksyon an LGUs asin PNP nganing mapundo an ilegal na sugal.

Napag-araman an nagpapataya sa jueteng dai naka-uniform nin puting t-shirt kan STL asin iba man an ginagamit na printed na papel kumpara sa STL alagad ginigibong prontera kan ilegal na sugal.

Si P/Lt. Col. Louie Dela Peña, opisyal na parataram kan PNP Provincial Office kan Camarines Sur nagpahayag na ‘‘command responsibility’’ kan sarong jefe de pulisiya maging kan City Director kun sa saindang ‘‘area of responsibility’’ dai napapapundo an ilegal na sugal.

Pinahimotikan man ni Dela Peña na igwa nang jueteng sa Camarines Sur mantang hinahalat ninda na isombong sa saindang opisina kun saen an ilegal na sugal nganing magkadarakop an mga collector.

Pigbuyagyag pa kan PCSO na trienta por ciento na kan mga lotto outlet sa provincia nagsara na matapos malugi kan saindang negosyo mantang apektado digdi an ingreso kan ahencia.

Kan mga nakaagi pang administrasyon kan City Hall pusog na nagcocontra sa jueteng asin igwa pang resolusyon digdi an Sangguniang Panlungsod laban sa ilegal na sugal. (dpa)