Stock nin NFA rice sa CamSur nagsusupay

Pili, Camarines Sur --- Nagsusupay an stock nin paroy asin bagas sa bodega kan National Food Authority (NFA) sa Camarines Sur na nag-aabot na sa labing 500,000 mil na sako alagad an Camarines Sur dai kabale sa mga provincia na magpabakal nin baratong presyo nin bagas na P20 envez sinda an masuplay sa Sorsogon na kulang an stock.

Naghahalat nalang sinda nin formal na direktiba hale sa opisina rehiyonal nganing darahon an suplay nin bagas sa provincia nin Sorsogon.

Ini an mga pahayag ni OIC Provincial Manager Marvin Malabanan kan NFA Camarines Sur mantang mayong direktiba an Department of Agriculture na magpabakal kan baratong presyo nin bagas.

An saindang bodega sa Pili, Camarines Sur pano-pano na nin labi sa 490 mil na sakong paroy mantang labing 37 mil na sakong bagas.

Panahon nin aranihan na haros nagpipirila an mga paraoma na mapatongod nin paroy sa ahencia huli ta cantidad P24 an kilo kan malinig asin alang na paroy hale sa paraoma mantang P18 sa bagong ani.

An Camarines Sur iyo an inaapod na tambobong nin paroy sa Bicol kaya ngani an mga bodega kaini perming tambak nin stock nin paroy asin bagas.

An opisina rehiyonal kan ahencia sa paagi ni Assistant Regional Manager Julie Llenaresas preparado sinda na magbakal nin baratong bagas alagad naghahalat sana kan orden hale sa DA Secretary.

An mga opisina provincial kan NFA nag-aandam na kan pag-molino kan paroy nganing kun igua nang direktiba makapabakal tolos nin bagas na P20.

Magigirumduman kan panahon nin presidential election, si Presidente Ferdinand Marcos na ibababa niya an presyo kan bagas sa P20.

Sa ngunian an reclamo kan mga paraoma iyo an baratong presyo nin paroy huli ta panahon nin aranihan.

Saro sa naheheling kan sinambit na sektor iyo an Rice Tariffication Law na inaprubaran sa dating administrasyon ni dating Presidente Rodrigo Duterte.