Suanoy na demolition order dae nag-aser sa Ciudad nin Naga

Ni Paulo DS. Papa

NAABALA an gigibuhon na kudta nang demolition activity aga nin Viernes, Mayo 22, sa mga kaharongan sa 14 hectares na daga sa Sitio San Rafael, Zone 7, Barangay Cararayan, Ciudad nin Naga dahil sa dayalogo na pigturuwangan kan city hall, barangay council asin kan Philippine National Police.

Mga alas-6:00 nin aga, kan magkariribuk an mga residente sa area dahil sa demolition team na magaba sa saindang mga pig-iistaran sa binino kan sarong writ of demolition hale sa Court of Appeals.

Susug ki Jesus Obiana, residente sa lugar, haloy na sindang mga tenants sa daga na pagsasadiri ni Mercedes Abella na haloy nang nagtalikod sa kinaban. Nagkaigwa sinda nin diretso sa daga huli sa implementasyon kan RA 6657 o Comprehensive Agrarian Reform Program (CARP law) sa paagi kan Department of Agrarian Reform.

Alagad pigbaranga an daga kan sarong Wilson Luz, na may special power of attorney sa propriyedad ni Abella, para sa mga bagong kagsadiri kaini. Kaya kadakol na daang beses nagngata-ngatang magkonduser nin demolisyon, sabi pa ni Obiana.

Katakod kaini, pigrani na ninda an isyu sa adjudication board kan ahensya alagad dae nagin paborable sa sainda an resulta. Huli digdi, Nagsunad na sinda nin motion for reconsideration sa korte asin naghahalat nin panibagong legal remedy laban sa demolition sa laog nin 15 dias.

Dugang pa ni Obiana, dae pa natatapos an 15 dias bigla nanaman nagburutwaan an mga lalaking kabale sa demolition team.

Sa lado man kan local na gobyerno pigsabi ni Atty. Angel Ojastro III, city legal officer, na nalikayan an posibleng kariribukan kan Viernes dahil sa dayalogo kaiba an sinda Punong Barangay Rodrigo Agravante, Engr. Rolly Campillos, pamayo kan Housing and Settlement Development Office, PCapt. Marlon Requillas, officer-in-charge kan Hepatura Seis kan Naga City Police Office, nagkapirang representantes kan Commission on Human Rights asin iba pa.

Napromesahan na man kan city hall an mga residenteng apektado kan demolisyon nin relocation sa Sitio Salunguigui, parehong barangay.

Susug man ki Campillos, dae man madudupahan kan gobyerno lokal sa ngapit panahon an mga residente sa area alagad igwa nang pigbakal an city hall nin panibagong lote na nasa lindong kan development.

Dugang pa ni Campillos, mantang dae pa natatapos an development bukas an saiyang opisina tanganing tawanan sinda nin temporaryomenteng iistaran na disente, may kuryente asin libre – apwera kan konsumo sa tubig.

SI Atty. Angel Ojastro III (saw ala) nagpapaliwanag sa mga residents kan Zone 7, Barangay Cararayan, Ciudad nin Naga mapadapit sa saindang estado sa dagang haloy nang pigbabaranga kan tenants asin mga bagong land owners. (PAULO DS. PAPA, Bicol Mail)