top of page

Suanoy na Kaugalian Tampok sa Pinagsarong LGU Event

GOA, CAMARINES SUR --- Tampok sa ika 216 Foundation Anniversary (Orgulyo kan Goa Festival) an mga suanoy na gawi-gawi kan mga Bicolano.


Sa paagi kan sarong resolution kan Sangguniang Bayan digdi, pinagsaro na sana an celebrasyon kan taonan na Orgulyo kan Goa Festival asin an Foundation Anniversary kaini.


An pinagsarong okasyon iguang temang, “Mga Suanoy na Kaugalian, i-orgulyo sa Ngonian” asin gigibohon sa Abril 18-25, 2023.


Mga macolor, maconsuelo asin bibong mga karawat, dadalanon asin pa-contest an mahihiling kan mga residentes asin mga bisita digdi.


Nagkakapira sa mga maconsuelong ralaban  iyo an barayohan nin paroy,  haragotan nin abaca, asin saralapidan asin rulobidan nin bandala kan abaca. 


Magkakaigua pa man nin karawat nin tatso, sangkayaw, saltarin, palo sebo, kadangkadang asin buradolan.


Dagdag kaogmahan an patiribayan sa pagdebate, tigsik, poster making asin essay writing contest. Apwera kaini, pipilion man an Binibining Orgulyo 2023, Barakong  Magayon 2023 asin pagreconusir kan Orgulyong taga Goa sa iba-ibang sector.


An pagtampok kan mga suanoy na gawi-gawi sa rona kan Kabikolan pigmawot kan local na gobyerno kan Goa sa pamamayo ni Alkalde Marcel S. Pan bilang pagsalingoy asin pagtaong kahalagahan sa mayaman na cultura kan  banwaan.                       

Banwaan kan Goa macelebrar kan ika- 216 Foundation Anniveraary (Orgulyo kan Goa Festival 2023) sa Marso 18-25, 2023


Ini sa pakikipagtabangan kan Sangguniang Bayan sa paagi ni Bise Alkalde  Alfredo P. Gonzag III. Siring man, ni Ms. Sheila Orlina Belleza, Municipal Tourism Officer. 


An Goa nagin sarong pueblo o banwaan kan Abril 21, 1807. Ini sarong 2nd class municipality asin iguang 34 barangay.  Sa distrito kan Partido, ini an pigcoconsiderar na centro kan progreso, orug na sa lado nin edukasyon asin comercio.


Mientrastanto, apwera sa advocacia sa cultura, an local na gobyerno  nagtatao man nin maninigong atencion sa mga programa dapit sa turismo digdi.


Segun ki  Belleza, an 2022 - 2031  Tourism Development Plan kan pighaman na kan local na gobyerno.  Linalaoman na ini maresulta  sa marikas na paggantad kan turismo sa banwaan na ini.

Comments


bottom of page