top of page

SUBSIDIYA IPAPASA SA CONSUMEDORES: Miembros kan 4Ps tatawan diskuwento sa electric bill

Magkakaigwa nin dugang na biyaya an Pantawid Pamilyang Pilipino Program (4Ps) beneficiaries na tinatawan nin subsidiya sa consumo nin kuryente alagad bako hali sa caja kan gobierno envez ipapasa sa miembros-consumedores kan cooperativa nin electricidad na nagcoconsumo nin sobra sa 40 kilowatt cada bulan.


An benepisyaryo dapat nagcoconsumo nin kuryente poon sa 0 hasta 15 kilowatt (KW) hasta 40 KW sa cada bulan na electric bill alagad igwang bracket na susunodon na an diskuwento poon sa 50 por ciento pababa sa 5 por ciento.


Ini base sa pinaluwas na Memorandum Circular kan Energy Regulatory Commission (ERC) na narecibe na kan mga cooperativa nin electricidad sa Bicol kan huring semana kan Marso 2023.


An subsidiya sa electric bill pinapa-implementar kan ERC base sa Acta Republica 11552 na mas midbid sa ‘‘An Act Extending and Enhancing the Implementation of Lifeline Rate, Amending for the purpose, Section 73 of the RA No. 9136, Otherwise known as the Electric Power Industry Reform Act of 2001’’.


An biyaya kabali na si dating mga ‘‘Lifeliner’’ na nagcoconsumo nin 40 KW na enot nang natatawan nin diez por cientong diskuwento.


Alagad segun pa sa ley igwang minasunod na ‘‘bracket’’ na dapat an sarong miembro kan 4Ps kun nagcoconsumo nin 0 hasta 15 kilowatt (KW) magkakaigwa nin 50 por cientong diskuwento sa electric bill; sa nagcoconsumo nin 16 hasta 20 KW igwang 40 por cientong diskuwento; sa nagcoconsumo nin 21 hasta 25 KW igwang 30 por cientong diskuwento; sa nagcoconsumo nin 26 hasta 30 KW igwang 20 por cientong diskuwento; sa nagcoconsumo nin 31 hasta 35 KW igwang 10 por ciento; asin sa nagcoconsumo nin 36 hasta 40 KW igwang 5 por cierto.


Sa Casureco II, si Rinner Bucay opisyal na parataram kan cooperativa nagpahayag na an Memo Circular kan ERC saindang narecibe kan Marso 31, 2023 asin andam nindang implementar kun kumpleto na sa mga documentary requirement an 4Ps na pigmamando kan ley.


Alagad saiyang piglinaw na halabaon an listahan kan ERC na dapat kumpletohon kan mga aplikanteng 4Ps kabali digdi an certificate hali sa DSWD; barangay certificate asin kadakul pang iba na an forma makukua sa opisina kan mga cooperativa nin electricidad.


An mamundo huli ta dagdag na pagpadificil sa enot nang ‘‘lifeliner’’ dahilan kan halabaon na documentary requirement base pigmamando kan ley.


Afuera pa kaini, aaboton nin sarong taon antes ma-aprubaran kan cooperativa sa dahilan na maagi pa sa halawig na evaluation sa mga nakaaging bill.


An Casureco II igwang 120 miembros-consumedores sa sakop kaining sampulong banwaan asin an Ciudad nin Naga. (dpa)

留言


bottom of page