Sukol kan obras publica sa RWP iyo an masusunod

An opisina nasyonal kan Department of Public Works and Highways (DPWH) iyo an nagpapasunod kan standard na sukol sa mga pig-iimplementar na road widening project (RWP) kan national road na sagcod sa ngunian iyo an nangyayari sa mga proyekto sa infrastractura.


Ini an kasimbagan kan Camarines Sur 3rd Engineering District kan DPWH sa Baras, Canaman, Camarines Sur sa tahaw kan propuesto kan environmentalist sa Ciudad nin Naga na saindang pigrerecomendar dapat lihisan nalang an mga puon nin kahoy sa iimplementar na road widening project asin an espasyo gibohon na bike lane.


Si Engr. Romeo Doloiras, District Engineer kan 3rd Engineering District sa Camarines Sur nagpahayag kaini kasunod kan enot na propuestong resolusyon sa Sangguniang Panlungsod kan Ciudad nin Naga na nagcocontra sa pagpurutol kan mga puon nin kahoy sa kalabaan kan Del Rosario Maharlika Highway kan ciudad sundo sa linderos kan Pili, Camarines Sur.


Si Consejal Ghiel Rosales iyo an padreno kan resolusyon asin suportado ni Consejal Mila Raquid-Arroyo alagad sa borotohan mayoria kan miembros sa SP nagbasura kan propuestong resolusyon.


Piglinaw ni DE Doloiras na antes sinda naputol kan mga kahoy na ulang sa RWP nakua muna sinda nin tree cutting permit sa Department of Environment and Natural Resources (DENR) asin nagsusunod sinda sa gabos na guidelines kan ahencia.


Puon na mag-implementar kan RWP an CamSur 3rd Engineering District igwa na sindang naputol na 308 puon nin mga kahoy sa Magsaysay Ave., Liboton Street, San Felipe, pasakat Carolina, Pacol asin Cararayan.


Dinagdag pa kan DPWH sa sunod na taon antes sinda maimplementar kan RWP seseguradohon na malinig na an road right of way sa mga ulang na estractura.


Ipapadagos an kaparejong proyekto sa San Felipe-Pacol-Carolina mantang pinaisi na an opisyales de barangay asin apektadong residentes.