Sumbikalan sa health protocols, pinatanidan

Kun igwa pang mga paltarason asin sumbikalan na residentes kan barangay na nagsisinutil magsunod sa health and safety protocols, pinatanidan na kan Liga ng mga Barangay kan Ciudad nin Naga na makukua ninda an hinahanap nganing arestaron asin pamultahon base sa ordinansa kan ciudad.


Si Liga President Antonio ‘‘Dodith’’ Beltran nagpahayag kaini sa tahaw kan pinaluwas na patanid ni Presidente Rodrigo Duterte na dapat arestaron an opisyales de barangay asin casohan kun dai na-iimplementar an health protocols na nagiging community transmission kan coronavirus disease.


Saiyang sinabi sa Bicol Mail sa entrevista sa paagi nin telepono kan Lunes, Mayo 31, 2021 sa miting kan Health Emergency Response Task Force (HERTF) nakaulay niya si P/Lt. Col Errol Garchitorena, jefe kan Task Force Ordinance na magtatarabangan sinda asin kan multi-force multiplier kabale an miembros kan tanod asin Bantay Barangay nganing higot na iimplementar an guidelines na pinapasunod kan IATF sa health and safety protocols.


Sinabi pa ni Beltran na igwang mga paltarason asin sumdikalan sa barangay na dai naggagamit nin face mask asin dai nasusunod an social distancing, alagad magtatarabangan sinda kan grupo ni Lt. Col Garchitorena nganing dakupon an mga pasaway.


Bako lang sa barangay maging sa mga establisimiento de negosyo regular na liliboton kan task force.


Si Garchitorena, dai palang nahahaloy nakabuelta sa Naga City Police Office siya an tinukahan ni Alcalde Nelson Legacion na jefe kan task force nganing estrictong iimplementar an mga ordinansa na may relasyon sa Covid-19.


Sa isyu na dapat arestaron an mga opisyales de barangay kun nag-aliwalas sa implementasyon kan health protocols, sinabi pa ni Beltran igwang basehan an mga pahayag ni Presidente Duterte mantang yaon ini sa Acta Republica 11332.


Sa datus kan Department of Health sa Bicol an Ciudad nin Naga haros aroaldaw iyo an may halangkaw na caso sa Covid-19.


An Camarines Sur kabale na sa sampulong mga provincia na naglalangkaw an caso sa virus. (DPAureus)