Superbisyon, kontrol sa special Cafgu kapot kan PA

An Philippine Army nagtutubod na dai magagamit kan Capitolio Provinvical kan Camarines Sur sa politica an bibilogon na Special Cafgu mantang an saindang misyon nganing makatabang sa paglaban sa insurhencia asin an kontrol asin superbisyon yaon sa 9th Infantry Division kan PA sa Bicol na may base sa Camp Elias Angeles, Pili, Camarines Sur.


Aprubado na kan Sangguniang Panlalawigan (SP) an ordinansa sa pagcrear kan Special Cafgu asin an mapirma sa Memorandum of Agreement iyo sinda Defense Secretary Delfin Lorenzana asin CamSur Governador Migz Villafuerte.


Ini an mga pahayag ni Lt. Col. Sisenando Magbalot Jr. battalion commander kan Cafgu sa CamSur asin CO, DCAU kan 9th Infantry Division.


Sinabi ni Magbalot sa memorandum of agreement dai magagamit na panlalamang sa politica kan Capitolio Provincial nin huli ta dapat igwang kasundoan an duwang lado kun saen madedestinong Cafgu detachment, alagad kun dai magkasundo an 9th ID iyo an may poder kun saen dapat madestino.


An dugang na 120 Special Cafgu dakulang tabang sa presenting nasa 1,000 na regular na miembros nganing labanan an insurhencia sa provincia mantang igwa na kaining kaparejong grupo na pigcrear sa Sorsogon asin Cordillera region, sabi pa ni Magbalot.


Kun gamiton sa politica asin iba pang katuyohan sagcod na gibohon na private army, an kasunduan babawion kan Department of National Defense.


Sinda maagi sa training kan 9th ID antes sinda iwarak sa mga lugar kan pigkukutahan kan rebeldeng New People’s Army.


Sa kasundoan kan duwang lado an gobierno provincial iyo an may obligasyon sa ‘‘subsistence allowance’’ parejo kan narerecibe kan regular na miembros kan Cafgu.


Sa presente an saindang allowance hale sa fondo kan Armed Forces of the Philippines (AFP) cantidad Php4,500 asin dugang na Php2,000 cada bulan.


An Camarines Sur kabale sa listahan kan AFP na igwa pang problema sa insurhencia kaya ngani naghagad pa nin dugang na fuersa sa Cafgu.


An MEMOAG renewable cada taon, sabi pa kan opisyal kan PA.


Si Presidente Rodrigo Duterte nag-issued nin Executive Order 70 nganing pakusogon an campanya laban sa kumunistang grupo sa paagi kan pagcrear kan National Task Force (NTF) na iyo an mangengenutan sa paghaman nin mga plano para sa katununingan kan nasyon.


Katuwang digdi an mga lokal na gobierno asin an saro sa kontribusyon kan Capitolio iyo an pagcrear Special Cafgu na an misyon contra insurhencia. (dpa)