Supermarket, Pano Nin Historia

Dakulang pasalamat sa pinag heras na pagmati ni Mr. Ramon Olano an pamayo kan respetadong Sumaro Bikolnon. Sa saiyang pig post sa facebook, yaon an ladawan sa kalangitan kan Supermarket na ipinapahiling an kagayonan kaini na iguang duwang paitok na hagyanan na iyo an agihan kan mga awto tanganing mag parking sa 3rd floor. Igua ining mga oficina sa paitok na dalan kaya haros kumpleto an hitsura kan supermarket. An rason kan Sumaro Bikolnon kaya ipinahiling ang siring na retrato iyo na kontrahon an anoman na plano na gabaon an supermarket tanganing tugdukan nin halangkaw na building arog nin condominium. Maka hinayang man nanggad na paraon sa mapa an sarong istruktura na pano-pano nin historia. Kan an supermarket bukasan kan 1969, nagserbe siyang landmark kan mga Naguenio asin saro ini sa tourist spot para sa mga bisita sa Naga ta saindang pinag hahangaan an kagayonan kaini, malinig asin mapresko. An supermarket garong sarong dakulang barangay na kadakol nin mga tawo na saimong makakaulay kaya ang buhay pano nin ayahay. Dai puedeng malingawan an mahiwas na 3rd floor kaini na iyo an pig paparadahan kan mga awto. Pinag hangaan kan mga dayuhan an fresh fish section na pig tetiendahian nin mga freskong sira asin an karneseria na mahihiling ang mga nakabitay na karne nin vaca, damulag asin orig. Sa first floor, harani sa paitok na dalan, igua nin inuman nin “gin” para sa mga adik sa rakorak arog kan mga paranbuno nin orig, tindero, kargador, asin mga parasaod, na mahilig sa inaapod na one shot, o tigis sa baso nin gin. An pinaka matuninong na parte kan supermarket iyo ang dry good section sa sirong kan mercado na iyo an tiendahan nin mga samhod, huyo, basket, kawatan na trompo, lampaso, tukawan na gibo sa rattan, asin kadakol pang iba. Igua man kaidtong karehan o kakanan na an mga serbidora huna mo mga artista sa kagayonan. An kada mag aging kalalakihan ini kinakabit para alokon na magkakan sa laog igua pa nin juke box. Kadakol magayon na historia an supermarket na makasayang na paraon para sana kaganan nin condominium. Kung ini gagabaon, sain na mapuersto an mga paratienda na an gamit iyo an nigo asin naka tukaw sana sa side walk kan market. An gusto kan Sumaro Bikolnon, iyo na ibalik an dating kalinigan kaini ta ang supermarket sarong magayon na pasyaran sa Naga City.