top of page

Suplay nin bagas sa Bicol abunda, sabi

Pili, Camarines Sur --- An Departamento de Agricultura (DA) nagseguro na abunda an suplay nin bagas mantang nagsakat sa 112 por ciento an rice sufficiency sa Bicol.


Ini an mga pahayag kan DA sa paagi ni Lovella Guarin, regional information officer kan ahencia sa tahaw kan paglangkaw sa presyo nin bagas sa mga mercado alagad base sa mga experiencia nalangkaw an presyo sa panahon na bakong aranihan nin paroy saka nabalik sa normal na presyo pag-abot nin mga bulan nin aranihan siring kan huring semana kan Septiembre asin Oktubre.


Si dating presyo na P39 naglangkaw na sa P42, si ibang klase nin bagas P46, P48 hasta P50 alagad sa mercado sa Libmanan, Camarines Sur na tambobong nin paroy sa Camarines Sur an presyo kan bagas mas mahal nagcacatidad nin P49 hasta P55.


Base sa datus kan DA hasta kan Hunyo 30, 2023 may ‘‘standing crop’’ sa Bicol nin sobra sa 67,000 hektaryas saka 30,000 digdi an nasa inaapod na ‘‘maturity stage’’ kan Hunyo 2023. Sa Camarines Sur an ‘‘standing crop rice’’ nasa 42,378 hetarya, 63 por ciento kan paroy kan Bicol nasa Camarines Sur.

Halangkaw na presyo kan bagas sa Libmanan, Camarines Sur nagdadalagan hali sa P49 hasta P55. An banwaan na ini inaapod na tambobong nin paroy sa Camarines Sur. (dpa)


An epekto sa paglangkaw sa presyo kan bagas sa tahaw kan mahal naman an presyo nin paroy sa cantidad na P23 an bagong ani an alang nababakal nin P26 cada kilo.


Sa ngunian apektado an palay procurement kan National Food Authority mantang mayo nang naglalaog na paroy hali sa mga cooperativa asin paraoma envez nadalagan sa mga pribadong kumprado huli ta mas halangkaw an presyo sa P23 alagad an NFA P19 sana.


Mayong nagiginibo an NFA huli ta an nagdidikta sa presyo ninda iyo an gobierno na mayong kakayahan nganing magkumpensya sa pribadong kumprado.


An mandado sa sainda kan Rice Tariffication Law iyo an pagbakal nin paroy nganing mag-stock nin bagas para sa food security. Napaluwas sana sinda nin bagas kun panahon na may calamidad na binabakal kan mga lokal na gobierno.


Prohibido na sa ahencia na magsuplay NFA rice sa mga mercado huli kan sinambit na ley.


Agrangay ngunian kan Kilusang Magbubukid sa Bicol sa pangako ni Presidente Ferdinand Marcos Jr. na mahuros sa P20 an kilo kan bagas envez nagparalangkaw. (DPA)

Commentaires


bottom of page