Suplay nin buhay na orig sa CamSur, bastante - DA

Pili, Camarines Sur --- Dai nagkukulang an suplay nin orig sa Camarines Sur na nagiging sarahotan kan negosyantes sa mercado kun naglangkaw an presyo kan saindang pinapabakal cada kilo kan karne huli ta nagmahal man an saindang binabakal buhay na orig.

An nangyayari siring sa Ciudad nin Naga an negosyantes digdi nagbabakal kan buhay na orig sa mga viajero na hale pa sa luwas kan provincia na mahal an presyo sa saindang pinapabakal sa ciudad sagcod nagpapatong kan dagdag na presyo kan karne sa mercado.

An presyo kan karneng orig sa Naga City People’s Mall poon sa P380.00, hasta P400 hale sa dating P350.

Sa entrevista kan Bicol Mail sa Department of Agriculture sa paagi kan saindang regional spokesperson Lovella Guarin, sinabi kaini an mga negosyanteng hog raiser digdi sa Camarines Sur iyo pa ngani an nagsusuplay kan buhay na orig sa luwas kan provincia maging sa luwas kan Kabikolan.

Dai magigin dahilan ninda an peste sa hayop siring kan African Swine Fever (ASF) huli ta negativo digdi sa provincia envez an nawawalat na lugar an Catanduanes.

Sa datos kan DA Bicol an Camarines Sur iyo an may pinakalangkaw na presyo kan buhay kan kaparejong hayop nagdadalagan sa P220 hasta P230, Masbate igua nang P220 cada kilo, P200.00 sa provincia nin Albay asin Sorsogon, Camarines Norte hababa an presyo – P190, asin pinakabarato sa Catanduanes na abot nalang sa P150.00 huli ta sagcod sa ngunian igua pang caso sa ASF.

Sa entrevista ni Bicol Mail correspondent Paulo Papa sa Acting City Agriculturist Ernesto Asense, sinabi kaini na nagmahal an karning orig sa NCPM ta an dahilan kan mga negosyante nagmahal man an presyo sa bakal ninda kan buhay na orig. Saiya pang sinabi na saro pa sa dahilan na nagmahal an presyo kan feeds asin kulang na an mga nag-aataman nin hayop sa saindang mga backyard mantang prohibido na base sa ordinansa kan ciudad.