SUPLAY NIN KURYENTE NAGNINIPIS: “Rotating brownout” kan NGCP, apektado an ECs
Apektado an mga electric cooperatives (ECs) sa Bicol kan pig-iimplementar na ‘‘rotating brownout’’ kan National Grid Corporation of the Philippines (NGCP), alagad an causa kaini iyo an pagnipis kan suplay kan kuryente ngunian na panahon nin tag-init.
Kun igwang biglaan na mga brownout sa Camarines Sur II Electric Cooperative (Casureco 11) na daing paisi sa miembros-consumedores asin isinasakripisyo an ibang lugar iyan huli kan ‘‘rotating brownout’’ alagad nabuelta man sana an suplay nin kuyente nin 15 hasta 30 minutos alagad may minsan inaabot nin sarong oras.
Ini an mga pahayag ni Rinner Bucay sa entrevista kan Bicol Mail sa paagi nin telepono sa tahaw kan mga warak-warak na mga nangyayaring brownout sa Ciudad nin Naga asin sa iba pang coverage area kan cooperativa.
Maging sa Casureco I sa Libmanan, Camarines Sur sinabi ni Mar Brina, parataram kan cooperativa na sinda apektado man asin si pinakahuring rotating brownout kan Abril 5 alagad an noticia narerecibe sana Abril 6 kan saindang opisina kaparejo man kan Casureco II.
Sa pinadarang noticia kan Abril 6 hale sa Communication Office kan NGCP, ‘‘Power Service Interruption at affected area franchise area: Casureco I (Pamplona 10MWA, Libmanan 20MVA, Sipocot 5MV, Ragay 5MV) ..time: 2:55pm to 3:00pm. Reason: automatic load dropping due to the outages of GN Power Plant (599MW) and Pagbilao Power Plant 1 (382MV) affecting Naga-Libmanan-Ragay 69kvline. From: Pedro Borja Jr. Sr. Manager-SLOM, District 3 Bicol & HVDC.
Sa kaparejong oras asin aldaw apektado man an Concepcion Pequeña 40MWA Power Substation sakop an Naga area, Minalabac, Milaor asin ibang lugar kan Pili, CSur.
Sinabi pa kan duwang ECs piglalaoman na igwa naman mangyayaring surprisang brownout na an noticia huri nang narerecibe ninda hale sa NGCP.
May mga insidente pa nin pag-shut down kan planta kun nagkakaigwa nin halangkaw na pangangaipo kan suplay nin kuryente huli ta grabe naman an init kan panahon ngunian na summer, sabi pa ni Bucay.
An problema kun magkulang an suplay sa enterong Luzon magkakaigwa nin harahalawig na brownout na igwang isasakripisyong lugar.
Pinapalibre sana sa rotating brownout an mga pribado asin pampublikong hospital nganing dai ma-apektohan an mga pasyente.
Sinabi pa kan Casureco II na nagiging triple na an init kan panahon na nagpigdeclara kan PAGASA kan huring semana kan Marso 2021.
Kun magparalangkaw an demand kan suplay kan kuryente ciertong masingil nin dugang na tarifa an saindang power suppliers na ipapasa man kan ECs sa miembros-consumedores.
Sinabi pa kan parataram kan cooperativa na taon-taon kun panahon nin tag-init nangyayari an rotating brownout sa ECs. (DPAureus)