Suplay nin sibulyas sa mercado nagdadakul
P240 hasta P320 kada kilo
Nagdadakul na an suplay kan sibulyas sa mga mercado sa Camarines Sur alagad harayo pa sa dating presyo na P80.00 hasta P100.00 cada kilo.
Sa Naga City People’s Mall (NCPM), sa ngunian an dalagan kan presyo nag-aabot sa P240 hasta P320 cada kilo depende sa klase kun darakula o saradit asin ini na si binaba sa dating controvercial na halangkaw na presyo na nag-aabot sa P700.00
Dai kuntento an mga parukyano sa presyo naghahanap man giraray nin mas barato.
Igwa nang Kadiwa on Wheels na pinapadalagan kan Agripreneur Farmers Association sa Libmanan, Camarines Sur. Naglilibot an truck kan Kadiwa sa nagkapera nang banwaan. Nakaabot na sa opisina rehiyonal kan Department of Agriculture sa Pili, CamSur sagcod sa P150.00 cada kilo an pabakal kan sibulyas (Lasona) mientras na an puting sibulyas P200.00.
SIBULYAS SA MERCADO. Sa wala retrato mayong nagbabakal huli ta mas mahal an presyo mantang sa toong retrato kumpara sa kataid na may mga parabakal na mas hababa an presyo. (Ems Aureus)
Pinahayag ni Lovella Guarin, opisyal na parataram kan DA Bicol, an suplay kan sibulyas pig-angkat kan grupo nin paraoma kan Libmanan, Camarines Sur sa paraoma sa provincia nin Pangasinan. Alagad an presyong P150 posibleng maghuros pa.
An opisina rehiyonal kan DA nakatalaan man na magbukas nin permanteng Kadiwa Stalls ngunian na bulan. An ahencia naka-bilog na nin maabot sa 30 Kadiwa center sa Bicol na pinapadalagan kan mga cooperativa nin paraoma.
Sa tahaw kan daing kasigurohan na magsulit sa baratong presyo kan sibulyas an DA nakatalaan magkunducir nin trials sa saindang research outreach stations nganing determinaran kun igwang lugar sa Bicol na puedeng tanuman nin sibulyas.
Anom na provincias digdi sa rehiyon an target kan research center kun arin lugar an puedeng matanum nin sil bulyas maging bawang. (dpa)
KADIWA ON WHEELS. Pinipilahan nin parabakal mantang barato an presyo kan sibulyas (Lasona) cantidad P150.00 cada kilo asin P200.00 cada kilo kan puting sibulyas. (DA-RV)