Suplay nin tilapia sa CSur nagkukulang na

Nagkukulang na an suplay kan tilapia sa mga mercado sa Camarines Sur hali banwaan kan Buhi, sa Rinconada area na pigtutubod epekto pa kan nangyaring fish kill kan bulan nin Oktubre asin Noviembre 2022 alagad nakakahipno sa kakulangan suplay hali na sa rehiyon cuatro.

Si Noni Enolva, opisyal na parataram kan Bureau of Fisheries and Aquatic Resources (BFAR) Bicol nagpahayag sa entrevista kan Bicol Mail sa paagi nin telepono na bako lang huli kan milyones pesos na danyos sa fish kill envez na harvest na kan mga fishcage operators an saindang tilapia sa Lake Buhi.

Sinabi pa na kulang na an stock mala ngani igwa nang nagpapaktura sa Buhi hali na sa Region IV-A asin iyo naman an pigsusuplay sa mercado sa Ciudad nin Naga asin pagtaraid na banwaan kan Camarines Sur.

Sinabayan kan problema sa tilapia iyo an kulang an nag-aabot na sirang dagat sa mga mercado huli kan raot nin panahon na perming apektado an mga parasira sa halangkaw na mga pag-alon sa kadagatan mantang igwang ‘‘gale warning’’ hali sa patanid kan Philippine Atmospheric, Geophysical and Astronomical (PAGASA).

Ini iyo man an dahilan kan pagparalangkaw kan presyo kan sira sa mercado.

An BFAR Bicol padagos sa pagtabang sa mga parasira na masuplayan nin tilapia asin bangus fingerlings para sa saindang mga fish cages. (BFAR)

Alagad sinabi pa kan BFAR sagcod sa ngunian dai pa ninda maseguro kun nuarin mabalik sa normal huli ta maluya an kakan kan tilapia epekto kan malipot na panahon.

Piglalaoman na posibleng bulan pa nin Febrero 2023 mamantenir na an suplay na pigdadara sa mga mercado nganing maibalik na si dating presyo na cantidad P110.00 cada kilo mantang sa ngunian nagdadalagan an presyo sa P150.00 hasta P180.00.

Magigirumduman an enot na report sa Lake Development Authority kan mga parasira an insidente nin fish kill hali sa jurisdiksyon kan barangays Tambo asin Cabatuan sagcod na nagbalyo sa ibang lugar.

Sa inbestigasyon kan LDO pigtutubodan an insidente causa kan maraot na panahon dara kan Severe Tropical Storm Paeng kan bulan nin Oktubre 2022.

Sa report kan LGU Buhi, Camarines Sur sa BFAR pinahayag na apektado an maabot sa 1,390 fish cages mantang maabot sa P15-M an danyos. (dpa)