Supt. De Guzman sagcod na sana sa Dec. 31, 2022 sa Naga

An pamayo kan Department of Education (DepEd) sa Ciudad nin Naga kabali na sa ciertong riribayan poon sa Enero 2023 alagad naghahalat nalang kan directiva hali sa DepEd Bicol.

Kinumfirmar sa Bicol Mail ni City School Division Superintendent Manny De Guzman mantang igwang memorandum circular an DepEd kan 2018 na dapat tolong (3) taon lang an termino kan sarong pamayo kan ahencia sa ciudad o provincia.

Pulicia na ini kan saindang ahencia, huli kaini si iba pang pamayo kan DepEd sa ciudad o sa provincia na inaabot na kan termino ciertong madedestino sa ibang lugar.

Si De Guzman, pighihidaw kuta kan mga paratukdo sa Naga maging kan opisyales lokal kan City Halll huli kan marhay na pagpadalagan alagad an desisyon sa paghali sa saiya nagdedenfende sa DepEd.

Siya dati nang nadestino sa DepEp Catanduanes, nadestino sa Ciudad nin Tabaco bilang OIC School Division Superintendent sagcod nadestino sa Ciudad nin Naga. Alagad kun saen siya madedestino poon sa Enero 2023 mahalat nalang kan ano man na desiyon kan saindang nakakalangkaw na opisyal sa Bicol.

Mientras tanto, babayaan ni De Guzman na saro nalang na escuelahan sa ciudad an nagpapadagos pa kan ‘‘blended learning’’ sa tahaw kan inaatubang na kakulangan mga classrooms asin paratukdo.

An escuelahan na ini iyo an Naga City School of Arts and Trade sa Barangay Sabang.

Maabot sa 22 an kakulangan na classrooms para sa junior asin senior high school.

An mga public/private schools sa ciudad amay nang nakapoon kan saindang 100 percent full face-to-face classes. (dpa)