Survey sa PNR project ginigibo sa CSur, Albay

Liwat naman nabuhay an modernisasyon kan Philippine National Railways (PNR) mantang nagrarani naman an eleksyon alagad sarong consulting firm an nagpahayag sa Bicol Mail na madadagos na an proyekto mala ngani perang bulan nang nakakaagi an mga personajes kan China Railway Engineering Consulting Group, Ltd (CREC) nagkaigwa na nin mga survey sa railroad towns sa Camarines Sur.

Sa survey nagkaperang relis kan perokarril sa Camarines Sur asin Albay an babagohon an mga linya alagad an Department of Public Works and Highways nagrereclamo huli ta mayong koordinasyon sa sainda kun saen magkakaigwa nin ‘‘railroad crossing’’ para sa agihan nin vehiculos.

Alagad posibleng magsikad na an konstruksyon kan Calamba, Laguna-Daraga, Albay route ngunian na premirong cuarto kan 2022.

Dai palang nahahaloy an Department of Transportation (DOTr) nagkaigwa na nin pirirmahan kan Design-Build contract sa Joint Venture of China Railway Group Co. Ltd., China Railway No. 3 Engineering Group.

Si DOTr Secretary Arthur Tugade iyo an nagpirma sa contrata na nagcacantidad nin Php142 bilyon na magpapadagos an proyekto dawa panahon nin eleksyon sa enot na 380 kilometros.

Sa listahan kan mga PNR Stations kan 380 kilometers PNR South Long Haul (CP-01 (Banlic-Daraga): Laguna, Banlic Bucal, Los Baños, San Pablo Candelaria asin iba pang mga lugar sa provincia kan Quezon asin digdi sa Kabikolan.

An kasundoan envuelto an konstruksyon kan 23 stations, 230 mga tulay, sampolong passengers tunnels, and 70-hectare depot sa San Pablo Laguna.

An PNR Bicol igwang laba nin 565 kilometro kan relis, na makonektar sa Metro Manila sundo sa southern Luzon asin sa provincias kan Sorsogon asin Batangas.

Kun marealisar an proyekto mapalipot nin viaje hale sa NCR asin Bicol na mababa na sana sa apat na oras hale sa presenting dose oras.