SUSOG SA ‘‘SAGIP SAKA ACT’’: ICCAFC hinuhorot sa SP bakalon P20 an paroy kan paraoma

Nagtutubod an Independent Component City Agriculture Fishery Council-Naga (ICCAFC) na maaprubaran na sa Sangguniang Panlungsod kan Ciudad nin Naga ngunian na 2026 an saindang kahagadan susog sa ‘‘Sagip Saka Act’’ nganing magpasar nin ordinansa na bakalon kan City Hall sa P20 cada kilo nin paroy sa paraoma envez na ipatungod sa mga kumprada na barato an presyo.

An ICCAFC sa paagi kan saindang opisyal, dating Consejal Julian Lavadia Jr. nag-atubang na sa sesyon kan SP na naghuhurot na matabangan an paraoma huli ta apektado na sa baratong presyo kan paroy.

Yaon na sa Committee on Agriculture ni Consejal Frank Mendoza an kahurotan kan sinambit na grupo na nagtutubod dai sinda papabayaan kan City Hall nganing matabangan sa haloy nang problema sa baratong presyo kan paroy poon na aprubaran an Rice Tariffication Law ni dating Presidente Rodrigo Duterte.

An saindang kahurotan base sa Acta Republica (RA) 11321 o mas bestado sa ‘‘Sagip Saka Act’’ na naaprubaran kan panahon ni dating Presidente Gloria Macapagal-Arroyo kan Abril 17, 2019, duwang bulan antes kan ultimong termino ni Lavadia kan 2019 mantang nagpaluwas sana nin Executive Order 101 Kan Oktubre 2025 si Presidente Marcos Jr. na iimplementar an ‘‘Sagip Saka Act’’.

An ley nagtutugot na pwedeng mag-utang an LGU para sa sinambit na katuyohan nganing makabangon sa pagbuhay an pobreng mga paraoma.

Si Lavadia, activo sa sektor nin paraoma mala ngani igua pang programa sa radyo na ‘‘Asenso sa Agricultura, Asenso sa Paraoma’’ asin dating Consultant kan City Agriculture Office.

Bako nang deficil sa City Hall na aprubaran an ordinansa mantang igua nang duwang molinohan sa upper Barangay kan Carolina sa tabang kan Department of Agriculture.

Dai palang nahahaloy si Senador Pangilinan nag-apelo sa mga LGUs na pwedeng bakalon ninda an gulay kan paraoma nganing gamiton kan DSWD sa panahon nin calamidad.

An ibang LGUs, siring kan ginibo kan Capitolyo Provincial sa Camarines Norte an saindang tabang sa paraoma iyo an pagdagdag nin P5 cada kilo sa pinapabakal na paroy sa National Food Authority. Ini ginibo man kan ibang LGUs sa Albay asin Sorsogon.