Suspek nakua bangkay na saBaybayon kan Cabusao, CSur

Ni Paulo DS. Papa

Duwang aldaw matapos kan krimen an suspek nakua sa Baybayon kan Sitio Villasan, Barangay Castillo, Cabusao, Camarines Sur, mga alas 9:00 nin aga na tolos pig-imbestigaran kan MPS pamamayo ni COP Capt. Albert Joven . An ama kan suspek nagsabi na saiyang kinukumfirmar na an bangkay na nasa decomposition na alagad saiyang binisto sa paagi kan sulot na singsing asin pustiso.

An COP nganing macierto na si Marfe Hufancia an nakuang bankay hinahagad na ninda an tabang sa NBI para sa DNA test sa familia kan suspek.

An mga biktima sinda Clodette Jane, 27-anyos ka live-in kan suspek asin an saiyang tugang na nginaranan na Kiela Mae, 25-anyos asin graduating sa CBSUA sa Pili, Camarines Sur. Sinda taga Cotmo, San Fernando, Camarines Sur nag-aarkila nin estaran sa Barangay Concepcion.

Sinabi kan NCPO an enot na biktima (Clodette), nakua mga alas 6:30 nin aga sa gilid nin tinampo sa Block, kan Barangay Concepcion Grande, may mga tama nin taga sa manlaen-laen na parte kan hawak asin pagkaputol kan saiyang braso asin tama sa liog asin an ika-duwang biktima na si Mae, nakua 1:00 nin hapon sa Zone 1, Green Acres Subdivision, Barangay Concepcion Pequeña. An saiyang bangkay nakapatos sa bedsheet asin nakagapos nin electrical wire. Sa imbestigasyon kan NCPO may tama nin mga saksak sa manlaen-laen na parte kan hawak.

An Barangay Council kan Concepcion Pequeña sa pamamayo ni Brgy. Kapitan Francis Mendoza nagsabi na saindang kinokundenar an nangyaring makangirat na caso alagad nagtutubod siya na saro sa causa kan krimen iyo an droga.

JUSTICE FOR KIELA

Mientras tanto, nagpaluwas nin statement an CBSUA, na nangapudan na matawan hustisya an makangirat na krimen na sinapo ni Kiela Divinagracia, saro sa duwang magtugang na nakuang gadan sa Naga.

Si Kiela sarong fourth year BS Agriculture major in Agriculture Extension Student kan sinambit na unibersidad.

Saindang kinukondenar an krimen asin hagad an hustisya sa biktima.