Suspek sa panggagadan ki Irish Mae Payonga nagtuga siya an kaggibo kan krimen

Naresolberan tolos kan Municipal Police Station kan Pili, Camarines Sur asin kan Camarines Sur PNP Provincial Office an panggagadan asin panglulupig sa biktimang Irish Mae Payonga, kan madakop an suspek asin nag-ako kan krimen sa paagi kan ‘‘Extrajudicial confession’’.

Sa pag-atubang sa press conference ni PNP Provincial Director Julius Caesar Domingo, MPS Chief of Police Lt. Col. Allan Macoy asin iba pang opisyales kan PNP, saindang kinumfirmar inako kan suspek na si Reymark Belleza, 18, an panggagadan asin panlulupig sa biktimang Ms. Payonga sa paagi kan extrajudicial confession sa presencia ni Atty. Reymafer Perveria Mata kan Public Attorney’s Office na siya an responsable sa krimen.

Sinabi pa kan PNP Camarines Sur na dakulang tabang an mga CCTV camera na harani sa lugar asin naheheling an suspek na si Belleza kun pano niyang sinakay sa padyak asin nilalay an biktima sa lugar kan krimen.

Segun mismo sa mga pahayag ni Belleza huli ta burat siya ginadan an biktima sa paagi kan pagtakop sa nguso asin dungo sa paagi kan saiyang kamot sagcod nautasan nin hinangos. Siya sarong parapadyak sa Cadlan, Pili, Camarines Sur.

Pig-aandam na an casong rape asin murder asin robbery kontra ki Belleza.

An biktima sarong senior high school student kan Ateneo de Naga University na pig-report na nawawara kan Oktubre 28 alagad nakua hapon kan Oktubre 31, 2022 sa maduoton na lugar kan Cadlan, Pili, Camarines Sur.

Nagmumundo an kumunidad kan Ateneo de Naga University matapos maaraman asin makunfirmar an nakuang bangkay na yaon sa laog kan sako iyo na an biktmang estudiante kan saindang Universidad. Hagad ninda an justicia sa biktima.