Suspek sa panggagadan sa maestranag-aatubang na nin caso kriminal

Nag-aatubang na nin casong pang-gagadan an suspek sa paggadan sa maestrang si Leizel Permale matapos matalikop kan mga awtoridad kan Naga City Police Office an may alias ‘‘Jason’’ sa San Cerilo, Pasacao, Camarines Sur.

Si City Director PCol. Rizaldy Caballero kan NCPO nagsabi sainda nang nacompleto an mga evidencia matapos kan busising imbestigasyon kan Station 4 kan NCPO.

An suspek nabisto sa paagi kan CCTV camera sa lugar kan residencia na pig-eerokan kan biktima sa Deca Homes Vistanza, Barangay Pacol, Ciudad nin Naga asin nadakop tolos kan mga miembros kan Station 4 kan NCPO dai ngani nag-24 oras matapos kan krimen.

Sa press conference ni Alcalde Leni Robredo kan Lunes, Hulyo 20, 2023 saiyang inomaw an NCPO sa marikas na pagkaka-arestar sa suspek nganing masangatan nin caso kriminal

Si Bise Alcalde Gabby Bordado, pagka-aga matapos kan krimen kaibanan an duwang opisyal kan Station 4 kan NCPO pig-inspeksyon an lugar na pig-eerokan kan biktima. Kinukundena kan City Hall an makangirat na krimen.

An biktimang si Permale ginadan kan Hulyo 18, 2026 na nadakop tolos an suspek sa Pasacao, Camarines Sur doce oras matapos kan krimen.

An biktima nag-graduate sa Ateneo de Naga University College of Education asin walong taong nang nagutukdo sa grade school.

An bangkay kan 28 anyos na paratukdo nakaburol sa Chapel kan Ateneo de Naga sa Barangay Pacol. Si Bordado nakisumaro sa pagkakagadan kan biktima. An magurang kan biktima nag-abot na hale sa Pangasinan na namumundo sa makangirat na krimen.

Si Bise Alcalde Gabby Bordado nakisumaro sa makangirat na pang-gagadan sa 28 anyos na maestra na nakaburol sa Chapel kan Ateneo de Naga University sa Brgy. Pacol. (Retrato: VM G.H.Bordado FB)