Suspetsado sa incidenteng bomb threat biktima nin bullying
Ni Sonny Malate
Goa, Camarines Sur --- Sarong biktima nin pangbubully an suspetsado sa incidente nin paghuma sa social media na may papaboagon na bomba sa tolong mga escuelahan digdi, sarong privadong colegio asin duwang pampublicong secondarya.
An incidente nagcausa nin pagkaalarma, hadit asin takot sa mga estudiantes asin personahes sa tolong escuelahan. Ini nagresulta sa pagsuspende kan klase asin pagkasibot kan Goa Municipal Police Station sa pangengenot ni PCPT Jesson Max F. Barcenas asin LGU sa pamamayo ni Alkaldesa Raquel S. Lim.
Sa initial na pakikiulay ni Luz L Eguia, Social Welfare Officer II kan Municipal Social Welfare Development Office (MSWDO) ki alyas "Mark Anthony,' ini nagboyboy na siya biktima nin pangbubully sa escuelahan asin comunidad.
Si Mark Anthony, 17 años, sarong residente kan poblacion digdi. Siya ika- walo sa siyam na magturogang, Grade 12 sa sarong pampublicong secondaryang escuelahan digdi, sarong kabale sa LGBTQIA+.community.
Tios an saindang pamilya mantang an ama mayong trabaho huli sa helang na pulmonary tuberculosis (PTB). An pagbuhay kan pamilya gikan sa pakikilabada kan ina. Duwa na lang sindang magtugang na kairiba kan magurang mientras na an iba pamilyado na.
Maluhaluhang pigsaysay ni Mark Anthony an soboot pagkantyaw, pagmenos, pagngirit asin iba pang raot na ugaling ginigibo kan dakol na tawo sa saiya sa laog kan campus asin comunidad huli sa saiyang hirohiro, pagtaram asin hitsurang sa bakla.
Huli kaini, siya nakamati nin magkaharalong anggot, pagkaherak sa sadiri, pagkauri sa iba asin depresyon na pigsasadiri sana niya sa halawig nang mga taon. An ginibong bomb threat ni Mark Anthony posibleng sarong manifestasyon kan "paglaban" niya sa makuris saka mapanghusgar na sociodad.
Dagdag pang stress ki Mark Anthony iyo an makuring pagtios kan saindang pamilya, Naglalakaw sana siya sa paglaog asin pag-uli hale sa escuelahan. Nadedeficilan man siyang magcomple kan mga project sa klase huli sa kawaran nin kwarta.
Segun ki Eguia, sa presente, si 'Mark Anthony' nasa Metro Manila para sa atencion medical. Siya may contact sa pamilya niya asin ini mauli sa Bicol kun kinakaipohan an presencia
Dagdag kan SWO II nakicoordinar na sinda sa escuelahan kan suspetsado tanganing makagraduar ini posible sa paaging modular, ALS, face to face class o magbalyong escuelahan ini.
Mientrastanto, segun ki Eguia dae pa ninda masabi kun dae makakasohan kan institution, individual o kan PNP Anti Cyber Crime Unit mismo an estudiante. Kun mangyari ini, nag-asegurar siya na si Mark Anthony protehido kan mga leyes para sa sarong menor de edad.
Katakod kaini, si Jocelyn Peralta, pamayo kan MSWDO asin si Eguia nangapodan sa mga magurang na higot na imonitor an paggamit kan saindang mga aki nin gadget tanganing mairayo sa kararatan sa social media orug na an cyber crime, kausmakan asin violencia.
Siring man, sinda nag-apelar sa comunidad na isikwal an gawing pangbubully asin pagmaltrato sa kapwa. An arog kaining negatibong situacion minacausa nin anggot, depresyon asin pagrebelde na magkaminsan minaresulta sa violencia.
Comments