Suwapang na Kabalang

Tigsik ko ining helang ni Cong

Nagpoon sana sa simpleng gatol

Nagrakrak, dae na nabobolong

Nag-ulakit, nanagin cancer kan nacion!

Tigsik ko an huslaon na Congressman

Napaturog sa sobrang kahugakan

Pag-abot kan bagyo nag-alimpasay

Nagbungkaras, nahulog sa kangkongan!

Tigsik ko an epal na Congressman

Buhay na buhay pa sa kinaban

Nakalapida na an pangaran

Sa mga proyektong bako niya man!

Tigsik ko si Cong na santo-santito

Mientras na nagdadakol an milagro

Kadakol man an nag-iidolo

Sa plaza, ginibohan nin rebulto!

Tigsik ko pa an huslaon na Congressman

Pighingutohan kan alalay na kabalang

Dagos nang naghukragong sa siram

Binangungot sa kabasogan!

Tigsik ko an suwapang na kabalang

An among na Congressman pighingutohan

Ngarahab sa sobrang kabasogan

An gabos na ngipon purong bukawan!