Swab Cab kan OVP yaon na sa Naga

Naglilibot na sa mga barangay kan Ciudad nin Naga an Swab Cab kan opisina ni Bise Presidente Leni Robredo na nagpuon kan nakaaging semana asin maglalawig sa laog nin duwang semana sagcod sa iba pang mga banwaan kan tercer distrito asin sa bilog na Camarines Sur.

Katuwang digdi an opisina ni Congresista Gabby Bordado, lokal na gobierno kan Ciudad nin Naga, Metro Naga Chamber of Commerce and Industry, Inc. iba pang mga volunteers maging grupo sibiko.

Sinabi ni Congresista Bordado an Swab Cab pigpunan sa NCRPlus Bubble kan OVP sa paagi kan Bayanihan e-Ataman kan Abril 2021 asin nagsikad na sa Naga kan Jueves, Hulyo uno.

Ipinahayag man ni Raffy Magno kan OVP maabot sa tres mil an saindang suplay kan swab antigen test asin an saindang target si mga nagkaigwa nin closed contact sa Covid-19 kabale na si may mga sintomas sa mga barangay base sa listahan hale sa Contact Tracing Center kan City Hall.

Kaayon sa bibisitahon kan Swab Cab iyo si mga nasa home quarantine na sa laog nin quince minutos maaraman tolos an resulta kun negativo o positivo sa virus nganing isuhay na sagcod kun kaipuhan madara sa hospital, sabi pa ni Magno.

Nagkapera nang mga barangay an nalibot alagad kun igwa pang bastanteng gamit sa swab antigen test maluwas na sa mga banwaan sa Camarines Sur na dapat igwang koordinasyon muna sa barangay.

Sinabi pa ni Bordado sa miembros kan media dai na kinakaipuhan magluwas sa saindang residencia nganing magpasiring sa mga testing facilities kan posibleng naulakitan envez sa residencia na gigibohon an swab test.

An Ciudad nin Naga asin Camarines Sur padagos an paglangkaw kan caso sa Covid-19 mala ngani an ciudad pinalawig pa an modified enhanced community quarantine (MECQ) hasta sa Hulyo 15 asin 34 mga banwaan sa Camarines Sur an nasa lindong pa kan General Community Quarantine (GCQ). (dpa)