SWMO nagpapanao nin organikong abuno

Pinapadagos kan Solid Waste Management Office (SWMO) kan City Hall an pagkonverter kan nalalapang basura sa organikong abuno kan Sanitary Land Fill (SLF) sa barangay San Isidro mala ngani igwa nang mga paraoma an nakikinabang.


Sa ngunian igwa pang stock na trecientos (300) sakong abuno mantang an ibang mga paraoma amay nang nagpareserba alagad libre sa siisay man na gustong maghagad sa City Hall.


Si Engr. Joel Martin, jefe kan SWMO nagsabi na igwa na sindang suking paraoma afuera kan libre na puede pa nindang ipa-deliver asin kun igwang order puede man kuanon na sana sa motorpool sa Diversion Road, Concepcion Pequeña.


Afuera kan libre sa arin man na interesadong paraoma, an City Agriculturist Office kabale na sa parukyano kan SWMO.


Sinabi pa ni Martin an arin man na indibiduwal na mahagad kinakaipuhan sanang magsurat sa opisina ni Alcalde Nelson Legacion.


An kombersiyon kan basura sa abuno enot nang pigpunan kan panahon ni dipuntong alcalde asin DILG Secretary Jesse M. Robredo sa orihinal na bagsakan nin basura sa barangay Balatas.


Maging kan panahon ni dating Alcalde John Bongat pigpadagos mantang dakul nang parukyanong mga paraoma an na-ngaganipo kan libreng organikong abuno.


Kan panahon ni Bongat nagbakal nin diez hektaryang lote sa brgy. San Isidro nganing iyo an babalyohan kan SNL asin narealisar an proyecto alagad natapos sa bagong liderato ni Alcalde Legacion sagcod na pinadagos an pagkonberter kan basura sa abuno. (dpa)