T I N G A T I N G

Tigsik ko si Puloto

Nagparamotomoto

An pamahawan tipo

Naghalaba an nguso!

Tigsik ko si Maria Magdalena

Sa madiklomon na plaza nagrampa

An kayod matumal abaa na

Nagparaagul-ol, nakaparasma!

Si Eba saka si Adan tigsik ko man

Kan an bawal na mansanas inupakan

Nakamangno sinda burles palan

Nakanood magsulot nin ukay-ukay!

Tigsik ko si Salvador Buntol

Lalaking burikaton, mayong ilusyon

Sa ngaran na trabaho masupgon

Duwa-duwa sana an brief, tagiptipon!

Tigsik ko si Lamedrong huslaon

Pasadpasad na sa kalye maghapon

Pag-albor sigarilyo malistohon

Sigeng pakiinom, mahigos magsomsom!

Tigsik ko an Hulyo saka Agosto

Tingating na bulan sa calendario

Sa tawong hulakon kapareho mo

Ini ciento uno porcientong totoo!