Tano Ta Binibisita Kan Imahen Ni Ina An Satong Mga Harong, Eskwelahan, Asin Komunidad?

Midbid an mga Bikolano sa apod na "Pueblo Amante de Maria"—an mga tawong hararom an pagkamoot asin pagtaong onra ki Birhen Maria. Kada Setyembre, rinibong mga deboto an nagtitiripon sa Syudad nin Naga tanganing bisitahon siya, makisumaro sa mga prusisyon, asin magdolot kan saindang mga pamibi. Nagtutubod kami na paagi sa saiyang mamomoton pangataman, idinadara nia an samong mga kahagadan sa saiyang Aki, si Jesu-Cristo.

Alagad ini minadara sato sa sarong importanteng hapot: Kun kita an mga nagbibiyahe tanganing bisitahon si Maria sa Naga, tano ta minabisita man siya sa satong mga harong, eskwelahan, asin komunidad?

Sa Ebanghelyo ni Lucas, pakatapos kan Anunsiasyon, si Maria tulos na nagbisita sa saiyang pinsan na si Elizabeth. Kan nag taong galang si Maria sa saiya, an aki sa tulak ni Elizabet luminukso sa kagayagayahan. Pano kan Espiritu Santo, si Elizabeth nagbalangibog, "Paladan ka sa gabos na babae, asin paladan an bunga kan saimong tulak."

Ini man an tunay na kahulugan kan pagbisita ni Ina sa satong mga harong, eskwelahan, opisina, asin komunidad. Si Maria dai nagdigdi huli ta kaipuhan niang bisitahon kita; imbes, kita an nangangaipo kan saiyang pagbisita. Sa paagi kan saiyang ladawan, malumanay nia kitang dinadara pasiring ki Jesus.

Pinapagirumdom nia kita na an satong mga harong dapat na magin lugar nin pamibi, pagkamoot, kapatawadan, asin pagkasararo. An satong mga eskwelahan dapat na mga lugar kun saen an katotoohan, kadunungan, asin paggalang inaataman. An satong mga komunidad dapat na magin mga lugar kun saen an mga kataed nagmamakulog sa lambang saro asin nagtatarabangan sa pagtubod.

An pagbisita ki Ina saro man na imbitasyon para sa mga pamilya na magtiripon giraray. Sa kinaban na kadakol na pamilya an nababanga huli sa kasibutan, trabaho, pag-adal, asin teknolohiya, inaapod kita ni Maria na magkasararo sa pagpamibi, orog na sa paagi kan Rosaryo, asin ibugtak giraray an Dios sa sentro kan satong buhay.

Dawa ngani si Maria dai pisikal na naglalakaw sa tahaw ta ngonian, an lambang pagbisita nagdadara kan parehong mensahe na saiyang dinara ki Elizabeth: "Siring na ako nagbisita kaidto ki Elizabeth, ako ngonyan nagmamawot na bisitahon an saindong mga puso asin an saindong mga harong tanganing darahon ko kamo sa sakuyang Aki, si Jesukristo."

Kaya sa kada pagbisita ni Ina sa satong parokya, dai kita basta-basta maghiling sa saiyang imahe, magkua nin retrato, o makisumaro sa prusisyon. Buksan ta an satong mga puso sa saiyang presensya bilang ina. Lugod magdara siya nin katoninongan sa satong mga pamilya, paglaom sa mga pinangluluyahan nin boot, pagpaomay sa mga naghehelang, pakikipag-ulian sa mga nababanga, asin mas hararom na pagkamoot ki Jesus sa lambang puso.

(From St. Vincent Ferrer Parish in Buhi FB)