Tanod na mabisita sa preso kan PNP, dakop huli sa droga

Kinumfirmar ni Barangay Kapitan Ricardo Siera kan Brgy. Peñafrancia, Ciudad nin Naga na barangay tanod ninda an nadakop na mapapuslit nin ilegal na droga mantang mabisita sa saiyang tugang asin pinsan na nalalaom sa selda kan Police Station 3 kan Naga City Police Office.

Pigbisto an barangay tanod na si Henjie Tesorero y Clarin, 46-anyos, residente kan San Antonio, Peñafrancia, Ciudad nin Naga.

Piglinaw kan Brgy Kapitan kan maglaog bilang miembro kan tanod an suspek, negativo sa ilegal na droga.

Sa report kan Police Station 3 mga alas 3:00 nin hapon kan Domingo, Hunyo 18 kan mag-abot sa presento nganing magbisita sa saiyang tugang asin pinsan na nakakacarcel na sinda Yancy Tesorero y Pelaes asin Hiroji Tesorero y Clarin, na parejong nadakop kan Hunyo 14, 2023 sa ilegal na droga.

An PNP igwang pinapasunod na standard operating procedure nganing arin man na mabisita sa preso dapat mag-agi sa inspeksyon sagcod nadiskubre na may dara asin nakatagong droga na maabot sa 27 gramos asin ini may market value nin P183,600.

Tolos man nilaom sa carcel saka nag-iiribahan na sinda sa selda kan Police Station 3 mientras na pig-hahanda an caso sa pagbalga kan Acta Republica 9165.

Dinagdag pa ni Siera kun pawaran nin sala sa caso kan jusgado pwedeng makabalik bilang tanod an suspechado.