Tariffication Law dapat ibasura kan masunod na Presidente

Dai pa tapos an laban kan sektor nin paraoma contra sa Acta Republica 11203 o Rice Tariffication Law (RTL) kan presenting administrasyon ni Presidente Rodrigo Duterte, mapili nin presidentiable na saindang susuportaran sa maabot na eleksyon sa Mayo 9, 2022 alagad dapat seguradohon na ibabasura kan bagong matukaw na presidente an RTL.

An RA 11203 iyo ngunian an nagpapasakit sa paraoma huli kan minus presyo kan paroy alagad an nakikinabang iyo an mga darakulang negosyante na iyo na an nag-aangkat nin bagas asin nagdidikta kan presyo kan bagas sa mercado.

Kun panahon nin aranihan nin paroy nabagsak an presyo kan paroy sa P12 hasta P13 cada kilo asin nalulugi na digdi an mga paraoma.

Si Silvestre Bonto, presidente nasyonal kan Confederation of Communal and National Irrigators Association of the Philippines (CCNIAP) nagpahayag na nagkakasararo sinda na magpili nin candidatong presidente na iyo an maseguro na kun manggana sa presidential election dapat ibasura an controvercial na Rice Tariffication Law.

Tada na sinda nin raya sa presenting administrasyon kan tawan nin prioridad ni Duterte an saiyang propuestong bill nganing maaprubaran sa congreso an RTL na pigpadrenohan ni Senador Cynthia Villar.

Hinale man si bayad sa patubig kan paraoma sa National Irrigation Administration alagad dakulang kalugihan sa bagsak presyo kan paroy, sabi pa ni Bonto.

Dos por ciento sana an saindang binabayad sa patubig alagad nalulugi an paraoma nin cuatro hasta cinco pesos cada kilo.

Mas marhay pang ibuelta an bayad sa patubig sa oma an RTL iyo an dapat i-repeal, sabi pa kan CCNIAP.

An RA 11203 inaprubaran ni Presidente Duterte kan Febrero 14, 2019 mantang an manlaen-laen na grupo nin paraoma nagkakaigwa kan saindang protest rally na nagcocontra sa rice tariffication law alagad daing pakiaraman an presidente dawa may reclamo an saindang sektor.

An ley nagtaong buelo sa darakulang rice traders alagad tinilok an dati nang mga pobreng paraoma, sabi pa. (DPAureus)