top of page

Tataghan nin droga sa Naga bako nang “sikat’’

Nagkulpa an operasyon kan ilegal na droga sa bantogan na Isla Sison na ngunian inaapod nang Sagrada Familia sa Barangay Peñafrancia, Ciudad nin Naga kasunod kan mga ginibong estratihiya kan Barangay Council maging sa operasyon laban sa droga kan Naga City Police Office asin Philippine Drug Enforcement Agency (PDEA).

Sa entrevista kan Bicol Mail ki Punong Barangay Ricardo Sierra, sinabi kaini maabot na sana sa viente (20) por ciento an nawawalat na envuelto pa giraray sa paggamit asin sa mga transaksyon sa ilegal na droga mantang igwa sindang mga ginibong estratihiya laban sa ilegal na droga.


Afuera pa kaini, si dating pusikit sa ilegal na actividad nagkadarakop na kan awtoridad mantang si iba nagadan sa anti-illegal drugs operation.


Perang dekada nang dai nahahali an problema kan barangay sa droga sa Sagrada Familia mala ngani bantogan an lugar sa rehiyon Bicol alagad sa saiyang administrasyon bilang retiradong opisyal kan PNP sa paagi kan mga diplomacia asin kampanya sa epekto sa salud nagbaba na si numero kan residentes digdi sa transaksyon sa droga.


Sa mga seminar kan PDEA sa Bicol, parating nasasambitan an ‘‘Isla Sison’’ na haloy nang panahon dai basta na reresolberan an isyu sa droga. An dahilan an ilegal na droga iyo na an hanap buhay kun igwa man nadadakop naribay si agom o si aki alagad sa ngunian pasiring na sa solusyon.


Huli kaini, puede nang apodon na bako nang ‘‘sikat’’ na tataghan sa droga an Sagrada Familia.


Saindang tinawan nin atensyon iyo an minasunod, 1. Information dissemination mapadapit sa epekto sa salud sa paggamit nin droga asin pagbuhay kan tawo; 2. Pagtabang sa mga tawong biktima kan droga sa paagi kan livelihood trainings, saka rice assistance; 3. Pagtaong pagkakataon na magkaigwang trabajo sa mga biktima kan droga na boot mag-reforma asin magbuelta sa komunidad.


Haros labi nang anom na bulan mayo nang operasyon an mga awtoridad sa suspechado sa droga asin dakulang bagay ini nganing mapuho an ilegal na actividad, sabi pa ni PB Siera.


Sa Barangay Drug Clearing Program sa 27 barangay kan ciudad 12 pa sana an declaradong drug clear kan PDEA Bicol. (DPAureus)

Comentários


bottom of page