Teenage pregnancy maaagapan na, sabi
Igwa nang mga ginigibong teenage pregnancy prevention an City Population and Nutrition Office (CPNO) kan lokal na gobierno kan Ciudad nin Naga sa paagi kan actividades sa mga barangay, diyalogo sa kumunidad, an pigtutulod na programa sa Department of Education nganing ilaag sa curriculum sa elementarya asin segundaryo kun panong maiibitaran an amay na pagbados.
An isyu sa teenage pregnancy bako lang sa lokal envez sa nasyonal mala ngani kan dating administrasyon ni Presidente Rodrigo Duterte pinahiro an National Population Commission nganing magkaigwa nin mga advocacia asin programa laban sa amay na pagbabados kan mga menor de edad.
Sa veinte siete (27) barangay kan ciudad, kinumfirmar sa Bicol Mail ni dating Consejal Ray-An Cedrick Rentoy jefe kan CPNO na lima nang mga barangay an may halangkaw na caso kan teenage pregnancy na kinababalihan kan Concepcion Pequeña, Balatas, Sabang, Mabulo, asin Calauag. Nag-edad nin 13 hasta 19 anyos an kabali sa listahan.
An magurang kan mga nagbabados na menor de edad saro sa dakulang tabang mala nganing nagcooperar sa saindang programa asin maibitaran an ‘‘repeat pregnancy’’. Sa ginibong miting sa mga magurang kan Deciembre 2022 nagpapasalamat man sa saiyang opisina nganing matabangan an jovenes na dai na mangyari liwat envez ipadagos an saindang pag-adal para sa saindang futuro sa edukasyon, sabi pa ni Rentoy.
Igwa nang mga paratukdo an pig-training sa sex education para sa sinambit na curriculum kan DepEd para maging katuwang kan CPNO kan ciudad.
Afuera kan mga menor de edad na may problema sa familia asin napapabayaan kan magurang an saindang mga aki saro sa nagiging causa alagad sa naglala na ngunian huli sa mga nagluluwas sa ‘‘social media’’ na dai na kontrolado kan gobierno.
An isyung ining pig-aatribuer pa sa kakulangan edukasyon asin kulang sa inpormasyon mapadapit sa ‘‘reproduction’’.
Sa pag-aadal kan National POPCOM kan nagtalikod na taon sa survey maabot sa 1.6 milyon na omboy an namundag na nag-eedad nin 14 hasta 19 anyos mientras na sa ciudad dai paman napaluwas kan saindang datus.
Sinabi kan World Health Organization an teenage pregnancy nag-eedad na poon sa 10 hasta 19 anyos alagad digdi sa Filipinas sinabi kan National POPCOM an amay nagbabados sa nasyon nag-eedad nin 14 hasta 19 anyos. (dpa)