''TEN YEARS VALIDITY'' KAN LICENCIA BABAWION: LTO nagpatanid sa mga nagsisinutil sa ley trafico

An Land Transportation Office (LTO) District Office sa Pili, Camarines Sur nagpatanid sa nagdadakul na nagbabalga sa ley trafico na recorded ini gabos sa opisina na oras mag-renew kan saindang licencia sa pagmanijo dai na makaka-aprubetsar kan ‘‘ten years validity’’ envez pwedeng magbaba nalang sa lima hasta sarong taon.

Si Eric Torrecampo, jefe kan sinambit na ahencia sa kabesira kan Camarines Sur nagbuyagyag sa Bicol Mail na haros aro-aldaw an saindang law enforcers nakakadakop kan mga nagsisinutil sa ley trafico.

Mala ngani igua sindang nadadakop na paulit-ulit na bako sanang sarong veces asin huli kaini mahuros sa ‘‘5 years validity’’ an saindang licencia bilang penalidad na posibleng sarong taon na sana sagcod na suspendiron.

An ‘‘ten years validity’’ sa licencia nag-epekto kan Hulyo 25, 2016 base sa Acta Republica 10930 matapos aprubaran kan duwang Camara asin kan Malacañang.

Sa LTO kan Ciudad nin Naga, kinumfirmar man ni Grace Rojas, jefe kan sinambit na District Office na ciertong dakul na an dai makaka-renew kan kaparejong validity period mantang nagdadakul an nagkakadarakop kan saindang mga law enforcers na nagbabalga sa ley trafico.

Mas halaba na an listahan kan mga nadadakop sa Ciudad nin Naga huli ta bako lang an saindang law enforcers an nagdadakop sa nagsisinutil sa ley trafico alagad yaon an Public Safety Office kan City Hall na aroaldaw nakaka-abot sa sainda an listahan sa paagi kan electronic ticketing na deretso na nalaog sa saindang ‘‘LTO System’’.

LTO traffic enforcers nagsisitar kan mga dai nagsusunod sa ley trafico. (LTO Pili)