Test run kan PNR sa Lupi, CSur nadiskaril

Nadiskaril tolos an dalagan kan Bicol Express kan Philippine National Railways (PNR) kan gibohon si test run antes magpoon an pormal na pagbubukas liwat kan estasyon kaini sa Lupi, Camarines Sur kan Septiembre 17, 2025.

An programa yaon an presencia ni PNR National Chairman Michael Macapagal, opisyales lokal kan perrokaril, Acting Mayor Noel Agravante asin iba pang miembros kan Sanggunian Bayan alagad an insidente nangyari sa Zona 7, Poblacion kan kaparejong banwaan o dos kilometros an distancia antes makaantos sa Lupi PNR Station antes gibohon an simpleng actividad.

Nahulog an train sa luwas kan relis marhay ngani mayong mga pasajeros huli ta test run sana hale sa Sipocot, Camarines Sur nganing ipaheling sa publico an viaje alagad inabot nin remalaso. Nakaresponde an sarong bagon nganing ihawas asin isulit sa relis an na-aksidenteng train.

Dai naman nagtaong paliwanag sa miembros kan media an opisyal kan PNR matapos kan insidente alagad sa lado kan LGU Lupi, nagpasalamat man si Acting Mayor Agravante huli ta dakulang tabang sa mga pasajeros mantang barato an flete sa perrokaril kumpara sa mga pampasajerong van.

Huli kaini, pigtalaan pa an regular na viaje kan tren sa Oktubre 2025 haling Ciudad nin Naga.

An PNR Station dati nang ginagamit kan igua pang regular na viaje an Bicol Express mantang pinagayon asin pinakarhay ngona an lomang estasyon kaparejo kan Libmanan PNR Station.

Magigin nang Naga sundo sa Lupi an ruta kan perrokaril afuera kan suhay na viajeng Naga-Legazpi.

Bicol Express pasiring sa Lupi PNR Station nadiskaril antes ponan an pagbubukas liwat kan estasyon kan Septiembre 17. (Retrato: Farrel Altamarino)