The Broken Dreams of Balcony

Kanogon na “Historia de un Amor” sabi kan mga para entre cuatro kung padagos nang mawawara an mga sinehan sa centro kan Naga ta gulping istorya nin pagkamoot an nabilog kan magkasing irog sa saindang balcony arog kan mga sumpaan, kapangakuan, plano sa karasalan, fecha kan presentaran, numero nin mgiging aki, mga ninong ninang na pulitiko, asin kung ano ano pang kaniguan. Halawig na panahon na an madiklom na balcony iyo an pinaka exciting na lugar sa kinaban, daog an Plaza, daog an libod o kabukiran, sagkod na mag abot na sa init nin payo ni Konsehala Felix an mga milagro digdi na garong nababastos daa an imahen nin daragang bikolana, kaya nagpasar nin ordinansa na ibawal an madiklom na sinehan tanganing an mga Romeo and Juliet makanood magdalan nin toltol asin bakong mag encuentro na huna mo mga gutom na sawa. Saro sa may magayon na balcony iyo an sinehan ni Bichara, an paglaog sa balcony garong naglaog sa sarong sikat na Palacio.

Si Tyang Kuring agom ni Tyong Lino, dai nanggad nalilingaw sa mga pangyayari kan siya lumbod pang daraga kan siya mahilig pa sa komportableng buhay sa balcony ta diyan nabilog an dayupot nindang pagkaminootan. Inapod ni Tyang Kuring an saindang love story bilang “Sarong supot nin Lanzones”. Harani na an Deciembre uso an lanzones na hale sa Laguna kan maisipan ni Tyong Lino na mag balon nin sarong supot nin Lanzones. Ogmahon si Tyang Kuring na may balon nin lanzones si Tyong lito na kaidto inaapod niyanbg tolitz ta sawa na siya sa salted peanut kaya gusto niyang purbaran an Lanzones na masiram kun saradit an pisog. Huri na kan maisihan ni Tyang kuring na an pag balon palan nin sarong supot na Lanzones sa sinehan sarong akto nin maisog na taktika sa pagkamoot na maka kubhan sa premiro alagad sa bandang huri ini magayonon asin nakaka addict.

Saro an Bichara sa inspirasyon kan mga taga “river side” na tuyong Domingo saindang pig dadayo para mag sine. Sa aro-aldaw na pag trabaho sa uma, pag banwit sa salog, pag dakop nin pasayan asin pag gibo nin tiklad na pang atop, an aldaw nin Domingo iyo an saindang “R&R”. Amay sa pagka aga, lunad nin lantsa, bitbit an linubiloban na dahon na may laog Rice, natong asin ginisang balaw, balon sa pag sine sa Naga. Naka pila an mga lansta sa pantalan kan tabuko bridge na lunadan kan mga taga river side, arog kan libmanan, Sua, Barobaybay, Punta Tarawal, Fundado, asin iba pa. Mas robo-robo an tawo kun an pasali iyo si FPJ, Amalia, Jun Aristorenas, Ramon Revilla, o si Nora Aunor. An mga taga Naga dai dapat mag laog sa sinehan pagka aga kan Domingo tanganing tawan buelo an mga para sine na bagong hawas sa lansta. Sa aldao nin Domingo, dyakpatan an kakanan arog kan New China, Rendezvous, Cosmos , asin Naga Lunch.

Si Gil sikat na radio reporter, dating Manager sa Bokatot sa Cabusao, inot niyang propesyon na dai malilingawan ta duman niya kakawat an dakulaon na butanding na nagsisigop nin tambak na balaw. Nag migrate sa Naga kan 1977 sa pagtubod na maogma mag istar sa Naga ta madadalan personal an mga nagkakanta sa Hagyanan sa Kabituonan asin maka hanap nin elosyon na bakong taga Cabusao. Si Gil nagtrabaho bilang empleado kan Sleeks Tailoring sadiri kaidto ni Senador Eddie Ilarde. Nabisto niya si Happy tubong Partido, seksi, magayon, na hawig ki Rosemarie Sonora. Palibhasa si Gil sarong guapong soltero, maskulado, matibay mag gitara, magayon mag kanta kan Let it be Me kan The Beatles kaya mamoot man saiya si Happy. An duwa nagsumpaan sa balcony ni Bichara, pugol an mga kamot, parehong nagtuturo an mga luha na nagpeksman na magiging eternally an saindang nana-nalian na pagkaminootan. Alagad sarong Domingo, nagsayuma si Happy na mag date sinda ni Gil sa Bichara ta siya mapuli sa partido para magkuang supply asin balon sa pag escuela sa Naga. Sa pagkahapon, solo solo ang Gil na nakatukaw sa may fountain kan PNB kan magsumbong an sarong dating kaklase sa GRCO sa NCF na si Happy daa mayo sa Partido kundi yaon sa balcony kan Bichara medyo nag aagrangy mantang pig paparakitik nin sarong lalaki. Natural, inabangan ni Gil an duwa sa lobby kan Bichara, asin sa hagyanan pa sana nagka igua nin borolyada, nagparibayan nin flying kick, kamros, karate, asin mga morodahan, marhy na lang ta nasawa nin pulis na nakatambay sa atubangan ni Bichara. Duman narealize ni Gil na mayong kamugtakan si ginibo nindang sumpaan sa balcony, mas makakanigo daa na an sumpaan gibohon sa atubangan kan altar o bagaman sa Grotto. An gabos natapos, natunaw, iyo idto an inapod na The Broken Dreams of Balcony.