TIGRE VERSUS AGILA

Tigsik ko an butanding na urag-uragon

Dati abusero huli sa raot na Among

Ngonian nagpapatawpataw sa ibang nacion

Sigeng ngala-ngala, mayo man nin yagbol!

Tigsik ko an butekeng empachado

Saro kunong de campanilyang abogado

Sa pag-alleluia sa tawong pig-iidolo

Nangana an tililing sa payo!

Tigsik ko ining mga panatiko

An alimantak grabeng cerado

Pokpokon mo pa man nin martilyo

Pigsasamba pa an mga santo-santito!

Tigsik ko an saginsagin na agila

Daeng ontok an kakak, garo nang bruha

Nawara sa sadiri, an utak nagrebenta

Garong mansaklot, naglalaad an mata!

Tigsik ko an drama kan duwang pa-bida

Mientras na nag-aarab-adab na

Si Juan nalilinga kan paepek na paiba-iba

Nalingaw kan lanit sa pagbuhay na daradara!

Tigsik ko an dingkilan kan tigre saka agila

Sigeng alimpasay parehong pabida

Urag-uragon, siisay an llamado sa duwa?

Wait lang, an exciting part harani na!