Tigsik

Tigsik ko ining maabot na eleksyon sa barangay

Mga birik-birik an tambod kadakol nang marhay

Kun saen may mehoras duman minakulambitay

Kadaklan sa mga kupitan, grabe na an alimpasay

Tigsik ko, kadaklan na aki ngunyan na panahon

Kapot pirmi an celfon kaya nagigin mga hugakon

Grabe an linigon, hugasan, an labahan tambakon

Delikado, ta an mga mata madali na magdiklom

Tigsik ko an buhay ta ngunyan na mga panahon

Abaaang sakit na baga na an kwarta ta matipon

Marhay pa an labahan abang dali sanag tipunon

Orog kun kadakol kamo sa laog nin sarong harong

Tigsik ko kun an sarong tawo igwa nin problema

Pagparapost sa facebook, dai man dapat talaga

Ata dai ka man matatabangan kan mga parabasal

Pagngingiritan, pagtsitsismisan ka pa logod ninda

Tigsik ko an maabot na pirilian sa barangay baga

Mga lideres grabe na an hugup-hugop, gama-gama

Na pag-abot nin karampanyahan, makadelihensya

Ibang pondo kan kandidato, isusubi sa bulsa ninda